ای پاسپورٹ کے لیے ’’نام‘‘ سے متعلق ’’مخصوص شرائط‘‘ عائد

اسلام آباد(قدرت روزنامہ) پاکستان نے اپنے شہریوں کو رواں ماہ سے ای پاسپورٹ کا اجرا شروع کر دیا ہے تاہم اس کے لیے نام سے متعلق مخصوص شرائط عائد کی گئی ہیں۔

ای پاسپورٹ کی درخواستوں کے لیے نام سے متعلق مخصوص شرائط کا اعلان مسقط میں پاکستانی سفارت خانے نے کیا ہے۔

سفارت خانے نے عمان میں مقیم پاکستانی شہریوں کو مشورہ دیا ہے کہ وہ نئے سفری دستاویز (پاسپورٹ) کے لیے درخواست دینے سے قبل اس بات کو یقینی بنائیں کہ ان کی ذاتی تفصیلات مقررہ معیار کے مطابق ہوں۔

سفارت خانے کی جانب سے جاری کردہ ایک عوامی نوٹس کے مطابق، ڈائریکٹوریٹ جنرل آف امیگریشن اینڈ پاسپورٹس (IMPASS) کی ہدایات کے تحت 23 اکتوبر 2026 سے ای پاسپورٹ کے اجرا کی کارروائی کا آغاز کر دیا گیا ہے۔

ای پاسپورٹ کے لیے نئی شرائط کے تحت، درخواست گزار کے نام میں ‘پہلا نام’ (First Name) اور ‘آخری نام’ (Last Name) دونوں کا ہونا لازمی ہے۔
اس لیے اب ایسے پاسپورٹ کی درخواستوں پر کارروائی نہیں کی جائے گی جن میں صرف درخواست گزار کا صرف ایک ہی نام درج ہو۔

نام کے حروف کی زیادہ سے زیادہ حد:

اس شرط کے مطابق، پہلے نام (First Name) کے لیے زیادہ سے زیادہ 50 حروف اور آخری نام (Last Name) کے لیے 40 حروف کی حد مقرر کی گئی ہے۔

اسی طرح رشتے داروں کے ناموں بشمول والد، شوہر یا سرپرست کے لیے بھی زیادہ سے زیادہ 40 حروف کی حد لاگو ہوگی۔

جن درخواست گزاروں کی شناختی دستاویزات میں صرف ایک ہی نام درج ہے، انہیں مشورہ دیا گیا ہے کہ وہ ای پاسپورٹ کے لیے درخواست دینے سے پہلے اپنا ‘نیشنل آئیڈینٹی کارڈ فار اوورسیز پاکستانیز’ (NICOP) یا ‘کمپیوٹرائزڈ نیشنل آئیڈینٹی کارڈ’ (CNIC) اپ ڈیٹ کروا لیں۔

سفارت خانے نے یہ بھی اعلان کیا ہے کہ ای پاسپورٹ سروس کے متعارف ہونے کے بعد، اب ‘مشین ریڈ ایبل پاسپورٹس’ (MRPs) کی درخواستوں پر مزید کارروائی نہیں کی جائے گی۔

تاہم، وہ پاکستانی شہری جنہیں 23 اکتوبر 2026 سے پہلے مشین ریڈ ایبل پاسپورٹ جاری کیے گئے تھے، وہ اپنے پاسپورٹ کی میعاد ختم ہونے کی تاریخ تک انہیں استعمال کر سکتے ہیں۔

عمان میں پاکستان ای پاسپورٹ کی فیس کا شیڈول:

سفارت خانے نے درخواست گزاروں کے لیے فیس کا شیڈول جاری کیا ہے، جس میں پاسپورٹ کی مدتِ میعاد، صفحات کی تعداد اور پروسیسنگ کی کیٹیگری (عام یا فوری) کے لحاظ سے فیس مختلف ہے۔

36 صفحات پر مشتمل پانچ سالہ پاسپورٹ کے لیے عام فیس 24 عمانی ریال ہے، جبکہ فوری (ارجنٹ) پراسیسنگ کی فیس 40 عمانی ریال ہے۔

اسی مدت (پانچ سال) کے لیے 72 صفحات والے پاسپورٹ کی عام فیس 44 عمانی ریال اور فوری فیس 72 عمانی ریال مقرر کی گئی ہے۔

10 سالہ میعاد والے پاسپورٹس کے لیے، 36 صفحات پر مشتمل دستاویز کی فیس عام کارروائی (normal processing) کے تحت 36 عمانی ریال اور ہنگامی کارروائی (urgent processing) کے تحت 72 عمانی ریال ہے۔

72 صفحات والے پاسپورٹ کی فیس عام کارروائی کے لیے 66 اومانی ریال اور ہنگامی کارروائی کے لیے 107 اومانی ریال ہے۔

مذکورہ فیسوں کے علاوہ 0.300 عمانی ریال (OMR) کا اضافی بینک چارج بھی لاگو ہوگا۔