ہاتھ پربیک وقت 18 انڈے توازن سے رکھنے کا عالمی ریکارڈ عراقی شہری کے نام

عراق(قدرت روزنامہ)عراق کے شہری نے ہاتھ کی پشت پر بیک وقت 18 انڈے توازن سے رکھنے کا عالمی ریکارڈ اپنے نام کرلیا۔ غیر ملکی خبر ایجنسی کے مطابق عراق کے علاقے ناصریہ کے رہائشی ابراہیم صادق نے اپنے ہاتھ کی پشت پر بیک وقت 18 انڈے توازن سے رکھ کر عالمی ریکارڈ برابر کردیا۔
گینیز بک آف ورلڈ ریکارڈز میں اپنا نام درج کرانے کے لیے ابراہیم صادق کو اپنی پشت پر انڈوں کو توازن کے ساتھ کم از کم 5 سیکنڈ تک رکھنا تھا جو اس نے باآسانی کرلیا۔2020 میں برطانیہ کے جیک ہیرس نے بھی ہاتھ کی پشت پر 18 انڈے توازن کے ساتھ رکھے تھے۔
ابراہیم صادق کا کہنا تھا کہ انہوں نے کچھ عرصہ قبل ایک وڈیو دیکھی تھی جس میں ایک شخص پتھروں کو توازن سے ایک دوسرے پر بڑی مہارت سے رکھ رہا تھا، اسی وڈیو سے وہ اس فن کی جانب متوجہ ہوا۔
عراقی شہری کا کہنا تھا کہ وڈیو دیکھنے کے بعد اس نے اپنے اطراف میں موجود چیزوں کو متوازن انداز میں کھڑا رکھنا شروع کردیا، وقت کے ساتھ اسے اس میں مہارت ہوگئی۔
ابراہیم صادق کا کہنا تھا کہ اس نے ریکارڈ بنانے کے لیے ہفتے کے 4 دن مشق کی۔عالمی ریکارڈ ہولڈر کا کہنا تھا کہ وہ چیزوں کو توازن سے رکھنے کے فن کا راز آسانی سے بیان نہیں کر سکتا لیکن اس کے لیے بہت زیادہ صبر، توجہ اور سکون کی ضرورت ہے۔