ایک سال میں خوردنی تیل کی قیمت میں 41.03 فیصد کا اضافہ ہوا

اسلام آباد (قدرت روزنامہ)ادارہ شماریات کے مطابق ملک میں ایک سال میں خوردنی تیل کی قیمت میں 41.03 فیصد کا اضافہ ہوا ہے۔ادارہ شماریات نے مہنگائی کے ماہانہ اعدادوشمار جاری کردیئے ہین جس کے مطابق ایک ماہ میں مہنگائی میں 1اعشاریہ 15 فیصد کا اضافہ ہوگیا جبکہ ملک میں مہنگائی کی مجموعی شرح 12.24 فیصد تک پہنچ گئی۔
ادارہ شماریات کے مطابق فروری 2021 میں مہنگائی کی شرح 8.7 فیصد تھی، سالانہ بنیادوں پر مہنگائی میں 3.54 فیصد کا اضافہ ریکارڈ کیا گیا جبکہ رواں مالی سال جولائی تا فروری مہنگائی کی شرح 10.52 فیصد رہی۔
ادارہ شماریات کے مطابق ایک سال میں ٹماٹر کی قیمت میں مجموعی طور پر 310 فیصد سے زائد کا اضافہ ہوا جبکہ خوردنی تیل کی قیمت میں 41.03 فیصد کا اضافہ ہوا ہے۔
ادارہ شماریات کے مطابق ایک سال میں ویجیٹیبل گھی 38.82 فیصد مہنگا ہوا، دال مسور 38.42 فیصد مہنگی ہوئی جبکہ سبزیوں کی قیمت میں 33.31 فیصد کا اضافہ ہوا۔
ایک سال میں گوشت 23.64 فیصد مہنگا اور چاول 11.89 فیصد مہنگے ہوئے، شہری علاقوں میں جنوری 2022 کے مقابلے میں فروری میں ٹماٹر 191.72 فیصد مہنگے ہوئے ہیں۔
مرغی کی قیمت 11.61 فیصد اور سبزیاں 10.69 فیصد مہنگی ہوئیں، ایک ماہ میں پھل 7.32 فیصد، مسٹرڈ آئل 5.33 فیصد، ویجیٹیبل گھی 2.68 فیصد اور کوکنگ آئل 2.37 فیصد مہنگا ہوا ہے۔
دیہی علاقوں میں ایک ماہ میں ٹماٹر 198.35 فیصد مہنگے ہوئے، دیہی علاقوں میں ایک ماہ مرغی کی قیمت میں 8.73 فیصد کا اضافہ ہوا جبکہ سبزیاں 10.69 فیصد اور کوکنگ آئل 3.74 فیصد مہنگا ہوا ہے۔