عمران کو سیاست سے آؤٹ کرنیوالے رابطے کر رہے ہیں، عمران اسماعیل
کراچی (قدرت روزنامہ)سابق گورنر سندھ عمران اسماعیل کا کہنا ہے کہ عمران خان کو سیاست سے آؤٹ کرنے کے خواب دیکھنے والے اب گوڈے پکڑنے کے لیے عمران خان سے رابطے کر رہے ہیں۔سماجی رابطے کی ویب سائٹ ٹوئٹر پر جاری کیے گئے بیان میں عمران اسماعیل نے کہا کہ اسمبلیوں سے استعفے دینے کے اعلان کے بعد سے کرپٹ الائنس کی حکومت کی نیندیں اڑ گئی ہیں۔
اسمبلیوں سے استعفے دینے کے اعلان کے بعد سے کرپٹ الائنس کی حکومت کی نیندیں اڑ گئی ہیں عمران خان کو سیاست سے آوٹ کرنے کے خواب دیکھنے والے اب گوڈے پکڑنے کے لیے عمران خان سے رابطے کررہے ہیں مگر امپورٹڈ حکومت کو رعایت نہیں ملے گی
— Imran Ismail (@ImranIsmailPTI) December 1, 2022
انہوں نے کہا کہ امپورٹڈ حکومت کو رعایت نہیں ملے گی۔واضح رہے کہ اسمبلیوں کی تحلیل کے معاملے پر پاکستان تحریک انصاف کی اعلیٰ سطح کمیٹی نے اپنی سفارشات تیار کر لی ہیں۔پی ٹی آئی کے ذرائع کے مطابق کمیٹی کے ارکان کی جانب سے 20 دسمبر تک اسمبلیاں تحلیل کرنے کی سفارش کی گئی ہے۔
ذرائع کا کہنا ہے کہ شاہ محمود قریشی کی زیر صدارت کمیٹی اجلاس میں سیاسی صورت حال کا جائزہ لیا گیا، اجلاس میں میاں اسلم اقبال، محمود الرشید، حماد اظہر، اعجاز چوہدری اور دیگر ارکان شریک ہوئے، پنجاب سے تعلق رکھنے والے کچھ ارکان نے فوری اسمبلیاں تحلیل نہ کرنے کا مشورہ دیا۔
