شیخ رشید کی گرفتاری قانون کے مطابق ہوئی، سعید غنی

کراچی (قدرت روزنامہ)پیپلز پارٹی کے رہنما سعید غنی نے کہا ہے کہ شیخ رشید کی گرفتاری قانون کے مطابق ہوئی ہے، ان کے خلاف بھی سخت کارروائی ہونی چاہیے، گرفتاری کے بعد ان کی زبان دیکھیں۔کراچی میں پریس کانفرنس کرتے ہوئے سعید غنی نے کہا کہ عمران خان ہمارا معاشرہ اور ملک تباہ کرنا چاہتا ہے، یہ ذہنی طور پر مفلوج آدمی ہے اور ملک دشمن ایجنڈے پر عمل پیرا ہے۔
انہوں نے کہا کہ عمران خان کے اثاثوں میں وزیراعظم بننے کے بعد اضافہ ہوا، ان کی کرپشن سب کے سامنے آچکی ہے، یہ بد کردار، جھوٹا اور منافق آدمی ہے۔پی پی رہنما نے کہا کہ عمران خان کے بیان پر لیگل نوٹس بھیجا گیا ہے، یہ عدالت میں آکر آصف زرداری پر لگائے الزام ثابت کریں۔
سعید غنی نے کہا کہ الزام کی نوعیت کا اندازہ لگائیں، اگر عمران خان کو کچھ ہو جائے تو ہماری قیادت پر الزام آئے گا، اس لیے عمران خان کے لگائے گئے الزام کی تحقیقات ہونی چاہیے۔انہوں نے کہا کہ عمران خان بے شرمی سے جھوٹ بولتا ہے، کوئی بھی شخص اس حد تک نہیں جاسکتا جہاں تک عمران خان گیا ہے، انہیں بھارتی اور یہودی ایسے ہی پیسے نہیں دے رہے تھے، کچھ مقاصد تھے۔
پیپلز پارٹی کے رہنما نے کہا کہ ہم حقائق لوگوں کے سامنے رکھتے ہیں، بدقسمی سے سوشل میڈیا پر جھوٹ رہ جاتا ہے، عمران خان کی جماعت کو اب مقبولیت حاصل نہیں۔سعید غنی نے کہا کہ عمران خان نے آئی ایم ایف معاہدے کی خلاف ورزی کی، معاہدے کے بعد مشکلات میں اضافہ ہوگا لیکن معیشت میں بہتری آئے گی۔انہوں نے کہا کہ آئین کے طریقہ کار کے مطابق الیکشن وقت پر ہونے چاہییں، وقت پر انتخابات ہوں گے تو بہت ساری چیزوں سے بچ جائیں گے۔