جامعہ کراچی: ڈاکٹر ذاکر نائیک کو پی ایچ ڈی کی اعزازی ڈگری دینے کی منظوری، سینیڈیکیٹ کے 3 اراکین کی مخالفت

کراچی (قدرت روزنامہ)جامعہ کراچی نے معروف اسکالر و مبلغ اسلام ڈاکٹر ذاکر نائیک کو پی ایچ ڈی کی اعزازی ڈگری دینے کی منظوری دے دی۔
اعزازی ڈگری دینے کی باقاعدہ منظوری یونیورسٹی کے سنڈیکیٹ کے اجلاس میں دی گئی، تاہم 3 اراکین نے اس پر تحفظات کا اظہار کرتے ہوئے مخالفت کی۔
مخالفت کرنے والے تینوں اراکین جامعہ کراچی میں حکومت سندھ کی جانب سے نامزد ہیں۔
ڈاکٹر ذاکر نائیک کو پی ایچ ڈی کی اعزازی سند دینے کے سلسلے میں خط یکم اکتوبر کو گورنر سیکریٹریٹ سے موصول ہوا۔
سنڈیکیٹ نے اکثریتی رائے سے ڈاکٹر ذاکر نائیک کو پی ایچ ڈی کی اعزازی سند دینے کی منظوری دی۔
مخالفت کرنے والوں میں ممبر سندھ اسمبلی و رکن سنڈیکٹ سعدیہ جاوید، شاہدہ رحمانی اور صاحبزادہ معظم قریشی شامل ہیں۔
مخالفت کرنے والے اراکین نے خواتین کے حوالے سے ڈاکٹر ذاکر کی رائے سے اختلاف کیا۔
ڈاکٹر ذاکر نائیک کو پی ایچ ڈی کی اعزازی سند دینے کی باقاعدہ سفارش جامعات کے چانسلر کامران ٹیسوری نے کی تھی۔
واضح رہے کہ معروف اسکالر ڈاکٹر ذاکر نائیک ان دنوں پاکستان میں موجود ہیں جہاں وہ مختلف تقریبات میں شرکت کررہے ہیں اور لیکچر دے رہے ہیں۔