چیف جسٹس یحییٰ آفریدی کا پہلا دن، اگلے 2 ہفتوں کے لیے بینچز کی تشکیل

اسلام آباد (قدرت روزنامہ)‏سپریم کورٹ آف پاکستان (ایس سی پی) نے پریکٹس اینڈ پروسیجر کمیٹی کی منظوری کے بعد 2 ہفتوں کے لیے ججز کا ڈیوٹی روسٹر جاری کر دیا، 28 اکتوبر سے یکم نومبر تک کے لیے 3 اور 2 ججز پر مشتمل 8 بینچز تشکیل دیے گئے ہیں، اسی طرح 4 سے 8 نومبر تک کے لیے بھی 8 بینچز تشکیل دیے گئے ہیں۔
ہفتہ کے روز چیف جسٹس آف پاکستان جسٹس یحییٰ آفریدی کی سربراہی میں پریکٹس اینڈ پروسیجر کمیٹی کا اجلاس ہوا، اجلاس کے دوران کمیٹی نے آئندہ 2 ہفتوں کے لیے ججز کا ڈیوٹی روسٹر جاری کیا، جس کے مطابق 28 اکتوبر سے یکم نومبر تک کے لیے 8 بینچ تشکیل دیے گئے، جن میں ایک بینچ 3 جب کہ 7 بینچز 2 ججز پر مشتمل ہوں گے۔
پریکٹس اینڈ پروسیجر ایکٹ کے تحت رجسٹرار نے روسٹر جاری کیا، جس کے مطابق سپریم کورٹ کے 8 بینچز 28 اکتوبر سے مقدمات کی سماعت شروع کریں گے۔
روسٹر کے مطابق 28 سے یکم نومبر تک مقدمات کی سماعت کے لیے چیف جسٹس یحییٰ آفریدی اور جسٹس شاہد بلال حسن پر مشتمل 2 رکنی بینچ تشکیل دیا گیا ہے جبکہ جسٹس منیب اختر اور جسٹس اطہر من اللہ بینچ نمبر 2 میں شامل ہوں گے۔
اسی طرح بینچ نمر 3 جسٹس امین الدین خان اور جسٹس عرفان سعادت خان پر مشتمل ہوگا جب کہ بینچ نمبر 4 جسٹس جمال مندوخیل، جسٹس مسرت ہلالی اور جسٹس ملک شہزاد پر مشتمل ہو گا، بینچ نمبر 4 واحد بینچ ہے جو 3 ججز پر مشتمل ہو گا۔
اسی طرح بینچ نمبر 5 جسٹس محمد علی مظہر اور جسٹس حسن اظہر رضوی پر مشتمل ہوگا جبکہ بینچ نمبر 6 جسٹس عائشہ اے ملک اور جسٹس عقیل عباسی پر مشتمل ہو گا۔
بینچ نمبر 7 جسٹس شاہد وحید اور جسٹس نعیم اختر افغان پر مشتمل ہوگا جبکہ بینچ نمبر 8 جسٹس سردار طارق مسعود اور جسٹس مظہر عالم میاں خیل پر مشتمل ہوگا۔
سپریم کورٹ آف پاکستان نے 4 نومبر سے 8 نومبر تک کے لیے بھی ججز روسٹر جاری کرتے ہوئے 8 بینچز تشکیل دیے ہیں جو پرنسپل سیٹ پر مقدمات کی سماعت کریں گے۔
رجسٹرار سپریم کورٹ کی جانب سے جاری روسٹر کے مطابق 4 سے 8 نومبر تک کے لیے تشکیل دیے گئے بینچ نمبر 1 میں چیف جسٹس آف پاکستان جسٹس یحیی آفریدی اور جسٹس شاہد بلال شامل ہوں گے جبکہ بینچ نمبر 2 میں جسٹس منصور علی شاہ، جسٹس عائشہ ملک اور جسٹس عقیل عباسی شامل ہوں گے۔
اسی طرح بینچ نمبر 3 جسٹس منیب اختر اور جسٹس اطہر من اللہ پر مشتمل ہوگا جبکہ بینچ نمبر 4 جسٹس امین الدین خان اور جسٹس عرفان سعادت خان پر مشتمل ہو گا۔
اسی طرح بینچ نمبر 5 جسٹس محمد علی مظہر اور جسٹس حسن اظہر رضوی پر مشتمل ہوگا جبکہ بینچ نمبر 6 میں جسٹس شاہد وحید اور جسٹس نعیم اختر افغان مقدمات کی سماعت کریں گے۔
بینچ نمبر 7 میں جسٹس مسرت ہلالی اور جسٹس ملک شہزاد کو شامل کیا گیا ہے جبکہ بینچ نمبر 8 میں جسٹس سردار طارق مسعود اور جسٹس مظہر عالم میاں خیل مقدمات کی سماعت کریں گے۔