پہلا ون ڈے: آسٹریلیا کیخلاف پاکستان مشکلات کا شکار، چوتھی وکٹ بھی گرگئی

اسلام آباد (قدرت روزنامہ)پاکستان اور آسٹریلیا کے مابین 3 ون ڈے میچز کی سیریز کا پہلا ون ڈے آج میلبرن میں کھیلا جارہا ہے اور پاکستان کی بیٹنگ جاری ہے۔ اب سے کچھ دیر پہلے تک پاکستان نے 19 اوورز میں 4 وکٹوں کے نقصان پر 70 رنز بنائے تھے۔
ملیبرن میں کھیلے جارہے پہلے ون ڈے میں آسٹریلیا نے ٹاس جیت کر پاکستان کو پہلے بیٹنگ کی دعوت دی۔ پاکستانی اوپنرز عبداللہ شفیق اور صائم ایوب نے بیٹنگ کا آغاز کیا تاہم دوسرے اوور کی چوتھی بال پر پاکستان کی پہلی وکٹ ضائع ہوگئی۔ صائم ایوب 5 گیندوں پر ایک رن بنا کر مچل اسٹارک کی گیند پر بولڈ ہوگئے۔
کچھ ہی دیر بعد پاکستان نے دوسری وکٹ بھی گنوا دی۔ چھٹے اوور کی چوتھی بال پر جب پاکستان کا مجموعی اسکور 24 تھا تو عبداللہ شفیق بھی پویلین لوٹ گئے۔ انہوں نے 26 گیندوں پر 12 رنز بنائے اور مچل اسٹارک کی گیند پر جوش انگلس کے ہاتھوں کیچ آؤٹ ہوگئے۔ پاکستان کے تیسرے آؤٹ ہونے والے کھلاڑی بابر اعظم تھے جو 17ہویں اوور میں 63 کے مجموعی اسکور پر ایڈم زمپا کی گیند پر بولڈ ہوئے۔ انہوں نے 44 گیندوں پر 37 رنز بنائے۔ اگلے اوور میں پاکستان کا مجموعی اسکور 70 ہوا تو کامران غلام بھی 6 گیندوں پر 5 رنز بنا کر پویلین لوٹ گئے، وہ پیٹ کمنز کی گیند پر جوش انگلس کے ہاتھوں کیچ آؤٹ ہوئے۔
عرفان نیازی اور صائم ایوب کو ون ڈے کیپ مل گئی
میچ شروع ہونے سے قبل پاکستان کرکٹ ٹیم سابق کھلاڑی وسیم اکرم نے پاکستانی پلیئرز عرفان نیازی اور صائم ایوب کو ون ڈے ڈیبیو کیپس پیش کیں۔
گزشتہ روز، قومی سلیکشن کمیٹی نے آسٹریلیا کے خلاف پہلے ون ڈے کے لیے پاکستان کی پلیئنگ الیون کا اعلان کیا تھا۔ کپتان محمد رضوان پہلی مرتبہ ون ڈے میچ میں قومی ٹیم کی قیادت کریں گے۔ پاکستان اور آسٹریلیا کے درمیان پہلا ون ڈے 4 نومبر کو کھیلا جائےگا۔
پاکستان پلیئنگ الیون میں عبداللہ شفیق، صائم ایوب، بابر اعظم، محمد رضوان، کامران غلام، سلمان علی آغا، محمد عرفان خان، شاہین آفریدی، نسیم شاہ، حارث رؤف اور محمد حسنین شامل ہیں۔
آسٹریلیا پلینگ الیون
آسٹریلیا پلیئنگ الیون، میتھیو شارٹ، جیک فریزر مکگرک، اسٹیون اسمتھ، جوش انگلس، مارنوس لابوشین، گلین میکسویل، ایرون ہارڈی، شین ایبٹ، کپتان پیٹ کمنز، مچل اسٹارک اور ایڈم زمپا۔
دورہ آسٹریلیا کا مکمل شیڈیول
پاکستان کی کرکٹ ٹیم دورہ آسٹریلیا پر ہے جہاں وہ میزبان ٹیم کے خلاف 3 ون ڈے اور 3 ٹی20 بین الاقوامی میچوں کی سیریز کھیلے گی۔ کینگروز کو ون ڈے سیریز میں مایہ ناز آل راؤنڈر پیٹ کمنز لیڈ کریں گے۔ 3 ون ڈے انٹرنیشنل میچوں کا پہلا میچ 4 نومبر کو ایم سی جی میلبورن میں کھیلا جائے گا۔
دوسرا ون ڈے میچ 8 نومبر کو ایڈیلیڈ اوول میں کھیلا جائے گا جبکہ تیسرا اور آخری ون ڈے میچ 10 نومبر کو پرتھ اسٹیڈیم میں کھیلا جائے گا۔ تینوں ون ڈے میچز ڈے اینڈ نائٹ ہوں گے۔
ون ڈے سیریز مکمل ہونے کے بعد دونوں ٹیمیں برسبین پہنچیں گی جہاں 3 ٹی20 میچوں کی سیریز کا پہلا میچ 14 نومبر ،دوسرا ٹی20 میچ 16 نومبر کو سڈنی کرکٹ گراؤنڈ جبکہ تیسرا اور آخری ٹی20 میچ 18 نومبر کو بیلریو اوول ہوبارٹ میں کھیلا جائے گا۔ ٹی20 سیریز کے تینوں میچز نائٹ ہوں گے اور فلڈ لائٹس کی روشنی میں کھیلے جائیں گے۔