ججز سینیارٹی پر اختلافات، جوڈیشل کمیشن کے رکن اختر حسین مستعفی

اسلام آباد (قدرت روزنامہ)جوڈیشل کمیشن آف پاکستان کے رکن اختر حسین نے استعفیٰ دیدیا۔
جوڈیشل کمیشن آف پاکستان میں بطور نمائندہ بار کونسل شامل رکن اختر حسین نے استعفیٰ دیدیا۔
اختر حسین نے ججز تبادلوں اور سینیارٹی ایشوز پر اختلافات کی وجہ سے استعفیٰ دیا۔
سماء سے گفتگو میں ان کا کہنا تھا کہ ججز سینیارٹی اور تبادلوں پر پاکستان بار کے مؤقف سے متفق نہیں تھا، مناسب یہی سمجھا کہ مستعفی ہوجاؤں۔
اختر حسین ایڈووکیٹ نے مزید کہا کہ میں وکلاء کے متفقہ مؤقف کی نمائندگی کرتا تھا، اس وقت 26 ویں ترمیم کے بعد بار میں اختلافات ہیں۔
ان کا کہنا ہے کہ اس وقت نان جوڈیشل ممبرز اکثریت سے ججز کی تعیناتی کررہے ہیں، ماضی میں جوڈیشل ممبران اکثریت رکھتے تھے ہم تب بھی اعتراض کرتے ہیں، میں چاہتا تھا کہ شفافیت کیلئے رولز بنائے جائیں۔
تیرہ رکنی جوڈیشل کمیشن آف پاکستان میں چیف جسٹس آف پاکستان سمیت 5 ججز، پارلیمنٹ کے 4 ارکان، اٹارنی جنرل، وزیر قانون، بار کونسل کا نمائندہ اور اسپیکر قومی اسمبلی کی جانب سے نامزد خاتون یا غیرمسلم رکن کمیشن کا حصہ ہوتے ہیں۔