رواں مالی سال کے 7 ماہ میں ترسیلات زر، برآمدات و درآمدات میں اضافہ ریکارڈ، وزارت خزانہ

اسلام آباد (قدرت روزنامہ)رواں مالی سال کے 7 ماہ میں ترسیلات زر، برآمدات اور درآمدات میں اضافہ ریکارڈ ہوا ہے۔ جولائی 2024 تا جنوری 2025 تک ترسیلات زر میں 25.2 فیصد کا اضافہ ہوا۔ برآمدات میں 9.7 فیصد جبکہ درآمدات میں 16.8 فیصد کا اضافہ ریکارڈ کیا گیا۔
اسٹیٹ بینک ذخائر 8 ارب ڈالر سے بڑھ کر 11 ارب 20 کروڑ ڈالر سے زائد رہے
وزارت خزانہ کی ماہانہ معاشی آؤٹ لک رپورٹ کے مطابق کرنٹ اکاؤنٹ خسارہ سرپلس اور بیرونی سرمایہ کاری میں اضافہ ریکارڈ کیا گیا۔ اسٹیٹ بینک ذخائر میں اضافہ اور روپے کی قدر مستحکم ہوئی۔ کرنٹ اکاؤنٹ خسارہ جولائی تا جنوری 68 کروڑ ڈالر سے زیادہ سرپلس رہا۔ اسٹیٹ بینک کے ذخائر 8 ارب ڈالر سے بڑھ کر 11 ارب 20 کروڑ ڈالر سے زیادہ رہے۔
جنوری 2025 میں 63 ہزار سے زائد پاکستانی ملازمت کے لیے بیرون ملک گئے
رپورٹ کے مطابق ایف بی آر محصولات میں جولائی تا دسمبر 26.2 فیصد اضافہ ہوا۔ جولائی تا دسمبر نان ٹیکس آمدنی میں 82 فیصد اضافہ جبکہ مالی خسارے میں جولائی تا دسمبر 36.1 فیصد کی کمی ہوئی۔ 7 ماہ میں مہنگائی کی شرح 28.7 فیصد سے کم ہوکر 6.5 فیصد پر آگئی۔ جنوری 2025 میں 63 ہزار سے زائد پاکستانی ملازمت کے لیے بیرون ملک گئے۔