‘کبھی ایسی مہمان نوازی کا نہیں سوچا تھا’، بھارتی صحافی وکرانت گپتا پاکستان کی تعریف کیے بغیر نہ رہ سکے

اسلام آباد (قدرت روزنامہ)آئی سی سی چیمپیئنز ٹرافی کی کوریج کے لیے پاکستان آنے والے نامور بھارتی صحافی وکرانت گپتا پاکستانی عوام کی میزبانی دیکھ کر دنگ رہ گئے اور تعریف کرنے پر مجبور ہو گئے۔
وکرانت گپتا کی مختلف ویڈیوز سوشل میڈیا پر وائرل ہو رہی ہیں جس میں انہیں لاہور کی سڑکوں پر گھومتے دیکھا جا سکتا ہے جہاں شہری ان کا نام لے کر نعرے لگاتے نظر آئے اور انہیں سندھی اجرک کا تحفہ بھی پیش کیا گیا۔
بھارتی صحافی کا کہنا تھا کہ انہوں نے کبھی نہیں سوچا تھا کہ پاکستانی عوام ان کی ایسے میزبانی کریں گے کیونکہ وہ ایک عام سے صحافی ہیں۔ انہوں نے کہا کہ پاکستانی عوام سے صرف انہیں ہی نہیں بلکہ بھارتی کرکٹ ٹیم کو بھی پیار مل رہا ہے اور وہ یہ دیکھ کر بہت حیران ہیں۔
وکرانت گپتا کا کہنا تھا کہ ایسے وقت میں جب پاکستانی ٹیم انڈیا سے میچ ہار کر چیمپیئنز ٹرافی سے باہر ہو گئی ہے پاکستانی عوام ویرات کوہلی اور روہت شرما کے حق میں بات کر رہے ہیں۔ لوگ ان کی عزت کرتے ہیں۔ ان کا کہنا تھا کہ پاکستان آ کر اتنا پیار ملا جتنا سوچا بھی نہیں تھا۔
واضح رہے کہ وکرانت گپتا نے بھارتی ٹیم کے پاکستان نہ آنے کے سوال پر بتایاکہ ’میں پاکستان اکیلا آیا ہوں اس لیے میری کوئی خاص اہمیت نہیں لیکن بھارت کی پوری ٹیم ہے جس کی اہمیت زیادہ ہوتی ہے، بھارتی ٹیم کے پاکستان نہ آنے کی وجہ صرف یہ نہیں کہ بھارتی ٹیم پاکستان میں غیر محفوظ ہے، وجہ یہ بھی ہےکہ دونوں ملکوں کے درمیان کوئی رشتہ نہیں اور اس رشتے کو سدھارنےکی کسی نے کوشش بھی نہیں کی، میں اس کے لیے کسی ایک کو قصور وار نہیں ٹھہراتا‘۔