مریم نواز نے بڑے چینلز کے اشتہارات کنٹرول کرنے کا اعتراف کیا ہے، فواد چوہدری

اسلام آباد (قدرت روزنامہ)فواد چوہدری کا کہنا ہےکہ مریم نواز نے بڑے چینلز کے اشتہارات کنٹرول کرنے کا اعتراف کیا ہے۔وفاقی وزیر اطلاعات ونشریات فواد چو ہدری نے سماجی رابطے کی ویب سائٹ ٹوئٹر پر جاری اپنی ٹوئٹ میں کہا ہےکہ یہ سنگین مالی بے ضابطگیوں کا ایک اور اعتراف ہے، کہتی ہیں میں پارٹی کا میڈیا سیل چلا رہی تھی۔انہوں نے مزید کہاکہ اس اعترافی بیان کے بعد امید ہے وہ اپنی اور خاندان کی بیرون ملک جائیدادوں کا اعتراف بھی کر لیں گی ۔۔۔ قوم چشم براہ ہے۔

مریم نواز نے بڑے چینلز کے اشتہارات کنٹرول کرنے کا اعتراف کیا ہے، یہ سنگین مالی بے ضابطگیوں کا ایک اور اعتراف ہے، کہتی ہیں میں پارٹی کا میڈیا سیل چلا رہی تھی،اس اعترافی بیان کے بعد امید ہے وہ اپنی اور خاندان کی بیرون ملک جائیدادوں کا اعتراف بھی کر لیں گی ۔۔۔ قوم چشم براہ ہے

— Ch Fawad Hussain (@fawadchaudhry) November 24, 2021

واضح رہےکہ اسلام آباد میں پریس کانفرنس کے دوران مریم نواز نے کہا کہ ثاقب نثار کی آڈیو لیک منظرعام پرآئی، آڈیو میں یہ نہیں پتا دوسری جانب صاحب کون ہیں، آڈیو لیک کے بعد پروپیگنڈا شروع کردیا گیا، ثاقب نثار کے خلاف آڈیو لیک چارج شیٹ ہے، آڈیو کی فرانزک امریکا کی معروف کمپنی سے ہوئی۔
مریم نواز نے کہاکہ فرانزک رپورٹ میں کہا کہ آڈیو میں کہیں بھی ایڈیٹنگ نہیں ہوئی، کروڑوں ووٹ لینے والا وزیراعظم اپنے خاندان سمیت عدالتوں کے چکر لگاتا رہا اور ثاقب نثار نے کہا کہ میں کیا پاگل ہوں کہ کورٹ کچہری کے چکر لگاؤں؟ عمر ان خان پر مقدمات ہوئے تو کیا ان کے خاندان کا کوئی شخص عدالت نے بلایا۔
مسلم لیگ ن کی نائب صدرکا کہنا تھا کہ ملک میں انصاف کس طرح عمل میں لایاجاتا ہے، یہ سب کے سامنے ہے، سابق چیف جسٹس ثاقب نثار کو قوم کے سامنے جواب دینا پڑے گا کہ انہوں نے نے قانون اورانصاف کا قتل کیوں کیا؟۔ ثاقب نثار جواب دیں کہ کس نے انہیں کہا تھا کہ عمران خان کو لانا ہے۔ سزا دینے کے لیے انہیں کس نے مجبور کیا۔؟
مریم نوازنے کہا کہ نواز شریف کو سازش کے تحت عہدے سے ہٹایا گیا، 5 سال میں نوازشریف کے حق میں 5 شہادتیں سامنے آئیں، نواز شریف کے حق میں سب سے پہلی گواہی جسٹس شوکت عزیزصدیقی کی ہے، شوکت عزیزصدیقی نے سنگین الزامات لگائے، شوکت عزیز نے کہا کہ انہیں نوازشریف اور مریم کو ضمانت نہ دینے کا کہا گیا،کیا شوکت عزیزصدیقی کی ویڈیو بھی جعلی ہے؟، شوکت صدیقی نے جن پر دباوکا الزا م لگایا انہیں کٹہرے میں بلایا جائے۔انہوں نے پریس کانفرنس میں مزید کہاکہ سابق جج ارشد ملک نے نواز شریف کو نیب مقدمے میں سزادی، ارشد ملک کی ویڈیو جو میں نے ریلیز کی تھی پوری دنیا کے سامنے ہے۔