کوئٹہ سمیت بلوچستان کے مختلف شہروں میں صبح سویرے آسمان پر دلکش مناظر ، شہری حیران مگر ماہرین مطمئن۔
کوئٹہ(قدرت روزنامہ)صوبائی دارالحکومت کوئٹہ اور بلوچستان کے مختلف شہروں میں آج صبح سویرے آسمان پر غیر معمولی مگر دلکش مناظر دیکھنے میں آئے سورج نکلنے سے قبل آسمان کے مختلف حصوں میں ہلکی روشنی اور رنگوں کے حسین امتزاج نے شہریوں کو حیران کر دیا۔
تفصیلات کے مطابق، صبح کے وقت کوئٹہ سمیت بلوچستان کے کئی علاقوں میں آسمان پر رنگ برنگی شعاعیں اور بادلوں کے انوکھے ڈھنگ کے سائے نمایاں نظر آئے کئی شہریوں نے اس منظر کو اپنے موبائل کیمروں میں محفوظ کیا اور سوشل میڈیا پر شیئر کیا، جس کے بعد مختلف تبصرے سامنے آئے۔
ماحولیاتی ماہرین کا کہنا ہے کہ آسمان پر اس طرح کے مناظر قدرتی موسمیاتی عمل کے باعث بنتے ہیں، جو بعض اوقات سورج کی شعاعوں کے بادلوں سے مخصوص زاویے میں ٹکرانے کے نتیجے میں پیدا ہوتے ہیں۔ ماہرین کے مطابق اس میں کسی قسم کی پریشانی یا غیر معمولی صورتحال کی کوئی بات نہیں، کیونکہ ایسے مناظر دنیا کے مختلف حصوں میں وقفے وقفے سے دیکھے جاتے رہتے ہیں۔
محکمہ موسمیات کے ذرائع نے بھی اس بات کی تصدیق کی ہے کہ آج صبح کوئٹہ کے فضائی دباؤ اور بادلوں کی ساخت میں معمولی تغیر دیکھا گیا، جو اس حسین نظارے کی ممکنہ وجہ ہو سکتی ہے۔
شہریوں نے اس خوبصورت منظر سے لطف اندوز ہوتے ہوئے دعا کی کہ بلوچستان کی فضا اسی طرح پرسکون اور خوبصورت بنی رہے۔
