دہشتگردی کا ناسور جڑ سے اکھاڑ پھینکیں گے، ریاست کی رٹ ہر صورت قائم ہوگی: سرفراز بگٹی کا دو ٹوک اعلان

“میری حکومت کو کوئی خطرہ نہیں”، وزیراعلیٰ نے ان ہاؤس تبدیلی کی تمام افواہیں مسترد کر دیں
(ڈیلی قدرت کوئٹہ) وزیراعلیٰ بلوچستان میر سرفراز بگٹی نے کہا ہے کہ صوبے میں دہشت گردی کی حالیہ لہر کا مقصد ترقی کے عمل کو روکنا ہے، تاہم ریاست کے دشمن اپنے ناپاک عزائم میں کبھی کامیاب نہیں ہوں گے۔ پنجگور اور دیگر علاقوں میں ہونے والے حملوں کا بھرپور جواب دیا جائے گا اور دہشت گردوں کا ان کے بلوں تک پیچھا کریں گے۔ کوئٹہ میں میڈیا کے نمائندوں سے گفتگو کرتے ہوئے وزیراعلیٰ بلوچستان نے واضح کیا کہ ریاست کی رٹ کو چیلنج کرنے والوں کے ساتھ آہنی ہاتھوں سے نمٹا جائے گا۔

انہوں نے کہا کہ “ہم امن پسند لوگ ہیں اور بات چیت پر یقین رکھتے ہیں، لیکن جو ہتھیار اٹھا کر بے گناہ شہریوں اور فورسز کو نشانہ بنائے گا، اس کے لیے کوئی معافی نہیں ہے۔” ایک سوال کے جواب میں سرفراز بگٹی نے حکومت کی تبدیلی اور ان ہاؤس چینج کی افواہوں کو سختی سے مسترد کر دیا۔ انہوں نے مسکراتے ہوئے کہا کہ “ہر دوسرے دن میری حکومت جانے کی پیشگوئیاں کی جاتی ہیں، لیکن ہم یہاں عوام کی خدمت کیلئے بیٹھے ہیں اور اپنی آئینی مدت پوری کریں گے۔ سازشی عناصر کو مایوسی کے سوا کچھ نہیں ملے گا۔” وزیراعلیٰ نے مزید کہا کہ صوبائی حکومت نوجوانوں کو روزگار اور تعلیم کے مواقع فراہم کرنے کیلئے پرعزم ہے۔ انہوں نے ناراض بلوچ نوجوانوں کو مخاطب کرتے ہوئے کہا کہ وہ پہاڑوں سے واپس آئیں اور صوبے کی ترقی میں اپنا کردار ادا کریں، ریاست انہیں گلے لگانے کیلئے تیار ہے۔