جیٹ فیول مہنگا ہونے پر پی آئی اے کا مسافروں کو دی جانے والی تمام رعایتیں ختم کرنے کا اعلان

اسلام آباد(قدرت روزنامہ)پی آئی اے نے مسافروں کو دی جانے والی تمام رعایتیں ختم کرنے کا اعلان کر دیا ہے، جبکہ بچوں اور شیرخوار بچوں کے لیے رعایت برقرار رکھی گئی ہے۔ قومی ایئر لائن نے جیٹ فیول کی قیمتوں میں مسلسل اضافے کے باعث اپنی پروازوں میں بھی کمی کرنے کا فیصلہ کیا ہے۔
پی آئی اے کے ترجمان نے پیر کو بتایا کہ حالیہ ہفتوں میں عالمی سپلائی چین میں غیر یقینی صورتحال، خصوصاً مشرق وسطیٰ میں جنگ کے باعث جیٹ فیول (JP-1) کی قیمتوں میں تیزی سے اضافہ ہوا ہے۔
ترجمان کے مطابق پی آئی اے نے اصولی فیصلہ کرتے ہوئے تمام رعایتیں ختم کر دی ہیں اور اب صرف بچوں اور شیرخوار بچوں کے لیے ہی رعایت برقرار رہے گی۔
انہوں نے کہا کہ ایندھن کی بڑھتی ہوئی قیمتوں اور ممکنہ مالی نقصانات سے نمٹنے کے لیے ایک اعلیٰ سطحی اجلاس میں حکمت عملی تیار کی گئی ہے۔
ترجمان کے مطابق پی آئی اے متحدہ عرب امارات کے لیے اپنی پروازیں محدود کر کے ہفتہ وار 16 کر دے گی۔ اس کے علاوہ اپریل کے اختتام تک متحدہ عرب امارات اور سعودی عرب کے علاوہ دیگر خلیجی ممالک کے لیے پروازیں عارضی طور پر معطل کر دی جائیں گی۔
انہوں نے مزید بتایا کہ پی آئی اے 11 اپریل سے بیجنگ اور 14 اپریل سے کوالالمپور کے لیے پروازیں بھی معطل کر دے گی۔
ترجمان کے مطابق یہ فیصلے جیٹ فیول کی قیمتوں میں مسلسل چوتھے اضافے کے پیش نظر کیے گئے ہیں۔ انہوں نے کہا کہ ایندھن کی قیمتوں کا پورا بوجھ مسافروں پر منتقل نہیں کیا جا سکتا، اسی لیے انتظامی سطح پر سخت فیصلے کرنا پڑے۔
انہوں نے امید ظاہر کی کہ عالمی سطح پر ایندھن کی قیمتیں جلد معمول پر آ جائیں گی جس کے بعد متاثرہ روٹس بحال کر دیے جائیں گے۔
گزشتہ ہفتے پی آئی اے کنسورشیم کے چیئرمین عارف حبیب نے جیٹ فیول کی قیمتوں میں 150 فیصد اضافے کے باعث ایئر لائن کے آپریشنز کے مستقبل پر خدشات کا اظہار کرتے ہوئے حکومت سے اس اضافے کو واپس لینے کا مطالبہ کیا تھا۔