موٹر سائیکل چالان سے پریشان افراد کے لیے ریلیف پیکیج

لاہور (قدرت روزنامہ) بھاری ٹریفک جرمانے اور جرمانے پر مبنی پرانا آرڈیننس 2025 منسوخ کر دیا گیا جس سے موٹر سائیکل سواروں اور رکشہ ڈرائیوروں سمیت عام شہریوں کو بڑا ریلیف ملے گا۔ تفصیلات کے مطابق گورنر پنجاب سردار سلیم حیدر نے عوامی ریلیف کی جانب بڑا قدم اٹھاتے ہوئے ’صوبائی موٹر وہیکل ترمیمی بل 2026‘ پر دستخط کر دیے۔
گورنر کے دستخط کے بعد سخت سزاؤں اور بھاری جرمانے پر مبنی پرانا آرڈیننس 2025 منسوخ کر دیا گیا ہے جس سے موٹر سائیکل سواروں اور رکشہ ڈرائیوروں سمیت عام شہریوں کو بڑا ریلیف ملے گا۔ جرمانوں میں تاریخی کمی اور جرمانے کا خاتمہ نئے ترمیمی بل کے تحت ٹریفک قوانین کی خلاف ورزی پر قید کو ختم کر کے جرمانے کی شرح میں 90 فیصد تک کمی کر دی گئی ہے۔
نئے جرمانے کے تحت لائسنس نہ ہونے پر جرمانہ 50 ہزار روپے سے کم کر کے 5 ہزار روپے کر دیا گیا ہے جب کہ یک طرفہ خلاف ورزی پر 6 ماہ قید اور 50 ہزار روپے جرمانہ ختم کر دیا گیا ہے اور اب صرف 5 ہزار روپے جرمانہ ہو گا۔ کم عمر گاڑی چلانے پر 50 ہزار جرمانہ اور قید کی سزا ختم کر دی گئی ہے اور اب 10 ہزار روپے جرمانہ ہو گا۔ اس کے علاوہ فٹنس سرٹیفکیٹ کے بغیر گاڑی چلانے پر اب 50 ہزار روپے کی بجائے صرف 5 ہزار روپے جرمانہ ادا کرنا پڑے گا۔ اوور لوڈنگ اور مسافروں کو چھت پر لے جانے پر جرمانہ 50 ہزار روپے سے کم کر کے 5 ہزار روپے کر دیا گیا ہے۔
گورنر پنجاب سردار سلیم حیدر نے کہا کہ عوام پہلے ہی شدید مہنگائی کا شکار ہیں، ایسی صورتحال میں ٹریفک قوانین کی آڑ میں اضافی اور بھاری جرمانے مناسب نہیں۔ انہوں نے مزید کہا کہ پیپلز پارٹی عوام کی جماعت ہے اور ہم نے ہمیشہ عوام کی خدمت کو ترجیح دی ہے۔ ان ترامیم کا مقصد قانون کی حکمرانی کے ساتھ ساتھ غریبوں بالخصوص یومیہ اجرت والے ڈرائیوروں پر مالی بوجھ کو کم کرنا ہے۔ نئے قوانین کا اطلاق فوری طور پر صوبے بھر میں ہوگا۔