بارکھان میں سیکیورٹی فورسز کا کلیئرنس آپریشن: ‘فتنہ الہندوستان’ کے 7 دہشتگرد ہلاک، میجر توصیف بھٹی سمیت پاک فوج کے 5 بہادر جوان شہید؛ آئی ایس پی آر
راولپنڈی(قدرت روزنامہ) پاک فوج کے شعبہ تعلقاتِ عامہ (آئی ایس پی آر) کے مطابق، 13 مئی 2026 کی صبح پاک فوج اور فرنٹیئر کور (ایف سی) بلوچستان نے مشترکہ کارروائی کرتے ہوئے ضلع بارکھان کے علاقے نوشام میں بھارتی سرپرستی میں سرگرم دہشت گرد تنظیم ’فتنہ الہندوستان‘ کے خلاف انٹیلی جنس بیسڈ کلیئرنس آپریشن کیا ہے۔
آئی ایس پی آر کے اعلامیے کے مطابق، آپریشن کے دوران سیکیورٹی فورسز نے دہشت گردوں کے ایک بڑے گروہ کا سراغ لگایا۔ فورسز اور دہشت گردوں کے درمیان ہونے والے شدید فائرنگ کے تبادلے میں ’فتنہ الہندوستان‘ کے 7 دہشت گرد ہلاک کر دیے گئے، جبکہ ان کے ٹھکانے سے بھاری مقدار میں اسلحہ، گولہ بارود اور دھماکا خیز مواد بھی برآمد کر لیا گیا ہے۔
فائرنگ کے اس شدید تبادلے میں مادری وطن کی حفاظت کرتے ہوئے پاک فوج کے ایک افسر سمیت پانچ بہادر جوانوں نے جامِ شہادت نوش کیا۔ شہداء میں ضلع پاکپتن کے 31 سالہ میجر توصیف احمد بھٹی، ضلع سکھر کے 36 سالہ نائیک فدا حسین، ضلع اسکردو کے 32 سالہ سپاہی ذاکر حسین، ضلع خانیوال کے 21 سالہ سپاہی سہیل احمد اور ضلع رحیم یار خان کے 24 سالہ سپاہی محمد ایاز شامل ہیں۔
آئی ایس پی آر کا مزید کہنا ہے کہ علاقے میں چھپے دیگر ممکنہ دہشت گردوں کے مکمل خاتمے کے لیے سرچ اور کلیئرنس آپریشن تاحال جاری ہے۔ سیکیورٹی فورسز اور قانون نافذ کرنے والے ادارے وفاقی ایپکس کمیٹی کے منظور کردہ قومی وژن ”عزمِ استحکام“ کے تحت ملک سے بیرونی سرپرستی میں ہونے والی دہشت گردی کو جڑ سے اکھاڑ پھینکنے کے لیے اپنے غیر متزلزل عزم پر قائم ہیں۔
