بلاول بھٹو ننھے یوٹیوبر شیراز کے مداح نکلے، ملاقات کی ویڈیو وائرل
گلگت بلتستان (قدرت روزنامہ)پاکستان پیپلز پارٹی کے چیئرمین بلاول بھٹو زرداری نے معروف ننھے یوٹیوبر شیراز اور ان کی بہن مسکان سے ملاقات کی، جس کی ویڈیوز سوشل میڈیا پر وائرل ہو گئی ہیں۔
بلاول بھٹو زرداری اس وقت انتخابی مہم کے سلسلے میں گلگت بلتستان کے دورے پر موجود ہیں، جہاں انہوں نے شیراز اور مسکان سے ملاقات کا وقت نکالا۔ اس ملاقات کے چند ویڈیو کلپس سامنے آنے کے بعد صارفین کی جانب سے انہیں خوب توجہ مل رہی ہے۔
ملاقات کے دوران بلاول بھٹو نے شیراز سے گفتگو کرتے ہوئے کہا کہ وہ کراچی سے تعلق رکھتے ہیں اور وہیں سے شیراز کو فالو کر رہے ہیں۔ ان کا کہنا تھا کہ وہ شیراز کے بڑے مداح ہیں اور ان سے مل کر انہیں بے حد خوشی ہوئی۔
میں کراچی سے آپ کا بہت بڑا فین ہوں،میرا نام بلاول ہے، کیا تمہیں میرا نام یاد رہےگا، بلاول بھٹو زرداری کی ننھے وی لاگر شیراز اور اس کی بہن سے ملاقات pic.twitter.com/vxEGkyIII4
— Siddique Jan SMT (@SdqJaanSMT) June 4, 2026
چیئرمین پیپلز پارٹی نے ننھے یوٹیوبر کے سماجی کاموں کی بھی تعریف کی اور کہا کہ وہ شیراز کی سرگرمیاں سوشل میڈیا پر دیکھتے رہتے ہیں۔ ان کے مطابق خوشی ہوتی ہے کہ شیراز نہ صرف محنت کر رہے ہیں اور شہرت حاصل کر رہے ہیں بلکہ اپنے علاقے کے لوگوں کے لیے عملی کام بھی کر رہے ہیں، جیسے پانی کی فراہمی اور اسکول کی تعمیر۔
بلاول بھٹو نے گفتگو میں اپنے نانا اور سابق وزیراعظم ذوالفقار علی بھٹو کا حوالہ دیتے ہوئے کہا کہ وہ گلگت بلتستان کے لوگوں کا بہت خیال رکھتے تھے اور اس خطے کے لیے ان کی خدمات نمایاں رہی ہیں۔
انہوں نے شیراز سے مزید کہا کہ وہ بھی چاہتے ہیں کہ جیسے ان کے بڑوں نے عوام کی خدمت کی، اسی طرح وہ بھی عوامی خدمت کا سلسلہ جاری رکھیں اور موقع ملنے پر لوگوں کے لیے عملی اقدامات کریں۔
