میلبورن (قدرت روزنامہ) عالمی نمبر ایک ٹینس کھلاڑی نوواک جوکووچ کوبیدخلی کیس میں عارضی ریلیف مل گیا۔ فرانسیسی خبر رساں ایجنسی کے مطابق آسٹریلین عدالت نے جو کووچ کو پیر سے قبل ملک سے بیدخل نہ کرنیکا حکم دے دیا ہے ، جوکووچ کی بیدخلی کیخلاف اپیل کی حتمی سماعت جمعرات کو ہوگی ۔ آسٹریلوی جج اینتھنی کیلی کا کہنا ہے کہ انصاف ضروری اپیلوں کے ذریعے اپنی رفتار سے آگے بڑھے گا۔
واضح رہے کہ نوواک جوکووچ آسٹریلین اوپن میں شرکت کیلئے بدھ کو میلبورن پہنچے تو ایئر پورٹ حکام نے سربین ٹینس سٹار کو ویکسین سے استثنیٰ اور غلط ویزا کی بنیاد پر داخلے سے روک دیا تھا۔ جوکووچ کو ویکسینیشن قوانین سے مستثنیٰ ہونے کے بعد آسٹریلین اوپن میں کھیلنا تھا لیکن انکی ٹیم نے ویزے کی درخواست نہیں کی تھی جو ویکسین نہ لگوانے پر طبی چھوٹ کی اجازت دیتا ہے۔
ٹینس سٹار سے میلبورن ٹولا میرین ایئر پورٹ کے ایک کمرے میں ویزے کی حیثیت اور استثنیٰ کے ثبوت کے بارے میں 8 گھنٹے پوچھ گچھ کی گئی تاہم کافی دیر انتظار کے بعد آسٹریلوی حکام نے ان کا ویزا منسوخ کردیا تھا۔ نوواک جوکووچ کا ویزا منسوخ کرکے انہیں سرکاری حراستی ہوٹل میں رکھا گیا ہے تاہم ٹینس کھلاڑی کی جانب سے ہنگامی آن لائن عدالت کی اپیل کے بعد جج نے حکم دیا کہ جوکووچ کو پیر سے قبل آسٹریلیا سے بیدخل نہیں کیا جائے گا۔ دوسری جانب اب تک واضح نہیں ہے کہ اگر جوکووچ عدالت میں جیت بھی جاتے ہیں تو وہ 17 جنوری سے شروع ہونیوالے آسٹریلین اوپن میں شرکت کرسکیں گے یا نہیں۔
