ایرانی ریال کی قیمت ، پاکستانی مارکیٹ میں نئی صورتحال سامنے آگئی

اسلام آباد(قدرت روزنامہ)ایرانی ریال کی قیمت میں مسلسل کمی کا رجحان برقرار ہے، جس کے باعث پاکستانی روپے کے مقابلے میں ایرانی کرنسی مزید کمزور ہو گئی ہے۔ تازہ ترین سرکاری اعداد و شمار کے مطابق ایران کے مرکزی بینک نے غیر ملکی کرنسیوں کے نئے نرخ جاری کر دیے ہیں، جن میں امریکی ڈالر، یورو اور دیگر بڑی کرنسیوں کے مقابلے میں ریال کی قدر میں مزید کمی ریکارڈ کی گئی ہے۔
ایرانی مرکزی بینک کے مطابق 27 جولائی 2026 کو ایک امریکی ڈالر کی سرکاری قیمت بڑھ کر 14 لاکھ 36 ہزار 205 ایرانی ریال ہو گئی، جبکہ یورو کی سرکاری قیمت 16 لاکھ 33 ہزار 131 ایرانی ریال مقرر کی گئی ہے۔ دوسری جانب مجاز منی چینجرز کے “ثناء سسٹم” میں امریکی ڈالر اور یورو کی قیمتیں سرکاری ریٹ سے بھی زیادہ دیکھی جا رہی ہیں۔
سرکاری اعداد و شمار کے مطابق 100 پاکستانی روپے کی قیمت 5 لاکھ 17 ہزار 104 ایرانی ریال مقرر کی گئی ہے۔ اس حساب سے ایک پاکستانی روپیہ تقریباً 5 ہزار 171 ایرانی ریال کے برابر بنتا ہے، جو پاکستانی روپے کی نسبتاً مضبوط پوزیشن کو ظاہر کرتا ہے۔
دوسری جانب ایران کی اوپن مارکیٹ میں امریکی ڈالر کی قیمت سرکاری ریٹ سے کافی زیادہ ہے اور یہ تقریباً 18 لاکھ 60 ہزار سے 18 لاکھ 90 ہزار ریال کے درمیان ٹریڈ ہو رہی ہے، جس سے سرکاری اور مارکیٹ ریٹس کے درمیان واضح فرق سامنے آیا ہے۔
پاکستانی اوپن مارکیٹ میں بھی ایرانی ریال کی قیمت مختلف ہے۔ کرنسی ڈیلرز کے مطابق ایک کروڑ ایرانی ریال کے نوٹوں کا پیکٹ اس وقت تقریباً 4 ہزار 500 سے 5 ہزار پاکستانی روپے میں فروخت ہو رہا ہے، جس کی بڑی وجہ دونوں ممالک کے سرکاری اور غیر سرکاری ایکسچینج ریٹس میں نمایاں فرق ہے۔
کرنسی مارکیٹ سے وابستہ ماہرین نے پاکستان اور ایران کے درمیان تجارت کرنے والے تاجروں کو محتاط رہنے کا مشورہ دیا ہے۔ ان کا کہنا ہے کہ ریال کی قدر میں مسلسل اتار چڑھاؤ کے باعث کسی بھی مالی لین دین سے قبل مقامی اور لائسنس یافتہ ایکسچینج کمپنیوں کے تازہ ترین ریٹس ضرور چیک کیے جائیں تاکہ ممکنہ مالی نقصان سے بچا جا سکے۔