متحدہ عرب امارات کا پاکستانی کارکنوں کے لیے نئی ورک ویزا پالیسی کا اعلان، پولیس کریکٹر سرٹیفکیٹ لازمی قرار

اسلام آباد(قدرت روزنامہ) متحدہ عرب امارات (یو اے ای) نے پاکستانی شہریوں کے لیے ورک ویزا حاصل کرنے کے عمل میں اہم تبدیلی کرتے ہوئے پولیس کریکٹر سرٹیفکیٹ (Police Character Certificate) کو لازمی قرار دے دیا ہے۔ نئی پالیسی کا اطلاق 20 جولائی 2026 سے ہو چکا ہے اور اب متحدہ عرب امارات میں ملازمت کے لیے جانے والے تمام پاکستانی شہریوں کو ویزا درخواست جمع کرانے سے قبل اس شرط کو پورا کرنا ہوگا۔
اوورسیز ایمپلائمنٹ سے متعلق جاری رپورٹس کے مطابق، یو اے ای میں ملازمت کے خواہشمند پاکستانیوں کو سب سے پہلے اپنے متعلقہ ضلعی یا صوبائی حکام سے گڈ کنڈکٹ یا پولیس کریکٹر سرٹیفکیٹ حاصل کرنا ہوگا۔ اس کے بعد اس سرٹیفکیٹ کی پاکستان میں متحدہ عرب امارات کے سفارت خانے سے تصدیق (Attestation) کرانا بھی لازمی ہوگی، جس کے بعد ہی ورک ویزا کی درخواست جمع کرائی جا سکے گی۔
حکام نے پاکستانی ملازمت کے امیدواروں کو ہدایت کی ہے کہ وہ ویزا درخواست جمع کرانے سے پہلے تمام ضروری دستاویزات، بالخصوص پولیس کریکٹر سرٹیفکیٹ، مکمل کر لیں تاکہ ویزا کے حصول کے عمل میں تاخیر، درخواست مسترد ہونے یا دیگر پیچیدگیوں سے بچا جا سکے۔
رپورٹس کے مطابق، یہ اقدام متحدہ عرب امارات کی جانب سے غیر ملکی کارکنوں کے پس منظر (Background Verification) کی جانچ پڑتال کو مزید مؤثر بنانے اور سیکیورٹی اسکریننگ کے نظام کو مضبوط بنانے کی پالیسی کا حصہ ہے۔ دنیا کے کئی دیگر ممالک بھی روزگار کے ویزوں کے اجرا کے لیے اسی نوعیت کے اقدامات کر رہے ہیں۔
متحدہ عرب امارات پاکستانیوں کے لیے بیرونِ ملک روزگار کی سب سے بڑی منڈیوں میں سے ایک ہے، جہاں اس وقت تقریباً 17 لاکھ سے زائد پاکستانی مختلف شعبوں میں خدمات انجام دے رہے ہیں۔ ہر سال ہزاروں پاکستانی تعمیرات، ہوٹلنگ، صحت، ریٹیل، ٹرانسپورٹ اور دیگر شعبوں میں ملازمت کے حصول کے لیے یو اے ای کا رخ کرتے ہیں۔
متعلقہ حکام نے ملازمت کے خواہشمند افراد پر زور دیا ہے کہ وہ صرف لائسنس یافتہ اوورسیز ایمپلائمنٹ پروموٹرز کی خدمات حاصل کریں اور ورک ویزا کے عمل کا آغاز کرنے سے قبل تمام ضروری دستاویزات، خصوصاً پولیس کریکٹر سرٹیفکیٹ، مکمل کر لیں تاکہ انہیں کسی قسم کی قانونی یا انتظامی دشواری کا سامنا نہ کرنا پڑے۔