’شہبازشریف نے تو کمرہ عدالت میں سینیٹ الیکشن کی ٹکٹوں پر بھی دستخط کیے تھے‘

اسلام آباد (قدرت روزنامہ)اینکرپرسن اور تجزیہ کار اسد اللہ خان نے شریف خاندان اور عمران خان کو ملنے والی جیل کی سہولیات کے تقابل کو مکمل طور پر بے بنیاد قرار دیتے ہوئے کہا ہے کہ دونوں کے حالات میں کوئی موازنہ بنتا ہی نہیں ہے۔ اس حوالے سے گفتگو کرتے ہوئے اسد اللہ خان نے کہا کہ آج حالت یہ ہے کہ بانی پی ٹی آئی عمران خان کو عدالت لایا ہی نہیں جاتا، جبکہ دوسری طرف ان پر یہ سخت پابندی عائد ہے کہ وہ جیل سے کوئی سیاسی پیغام یا گفتگو باہر نہیں بھیج سکتے، اس کے برعکس ماضی میں جب شہباز شریف کوٹ لکھپت جیل سے نیب عدالت لائے جاتے تھے، تو ان کے لیے حالات بالکل مختلف ہوا کرتے تھے۔

عمران خان پر پابندی ہے کہ جیل سے سیاست نہیں کر سکتے، جب شہباز شریف کو کوٹ لکھپت سے نیب عدالت لایا جاتا تھا تو پانچ منٹ کی سماعت کے بعد جب تاریخ پڑ جاتے تھی اور شہباز شریف جج صاحب سے کہتے تھے عملے کو حکم دیں کہ مجھے ابھی واپس نہ لے جائیں مجھے اپنے رفقا سے بات چیت کرنی ہے۔ پھر… pic.twitter.com/SwvR91L3Qw

— Asad Ullah Khan (@AUKhanOfficial1) August 20, 2026

اسد اللہ خان نے بطور چشم دید گواہ عدالت کے اندرونی واقعات بیان کرتے ہوئے انکشاف کیا کہ جب شہباز شریف عدالت میں پیش ہوتے تو جج سے وکیل نہ آنے کا کہہ کر سماعت ملتوی کرواتے، جیسے ہی جج صاحب جانے لگتے تو شہباز شریف ان سے درخواست کرتے کہ عملے کو کہیں کہ مجھے ابھی واپس نہ لے جائیں کیونکہ میں نے اپنے رفقاء سے گفتگو کرنی ہے، عدالت ان کی درخواست پر حکم دیتی اور وہ دو دو گھنٹے تک کمرہ عدالت میں بیٹھ کر سیاسی میٹنگز کیا کرتے تھے۔
انہوں نے مزید انکشاف کیا کہ شہباز شریف نے نیب کے اسی کمرہ عدالت میں بیٹھ کر سینیٹ انتخابات کے لیے پارٹی ٹکٹوں پر دستخط بھی کیے تھے، جس کا وہ خود اپنی آنکھوں سے مشاہدہ کر چکے ہیں، اب ان تمام حقائق کے ہوتے ہوئے یہ دعویٰ کیسے کیا جا سکتا ہے کہ عمران خان اور شریف خاندان کو جیلوں میں ایک جیسا ماحول اور سہولیات میسر ہیں یا مہیا رہی ہیں؟ جو موازنہ کیا جاتا ہے کہ نوازشریف فیملی اور عمران خان کی جیل کا تو اس کا کوئی موازنہ بنتا ہی نہیں ہے۔