’کھلاؤ کھانا شانا، کوئی دیو تین چار ہزار بس، زیادہ نہیں، آپ بھائی ہو!‘

اسلام آباد(قدرت روزنامہ)وفاقی دارالحکومت اسلام آباد میں پولیس اہلکار کے رشوت مانگنے کی ایک ویڈیو وائرل ہوئی ہے، جس میں اہلکار قانون کی پاسداری کرانے کے بجائے شہری کے ساتھ کھلے عام رقم کا سودا کرتے ہوئے دیکھا گیا ہے۔ تفصیلات کے مطابق سوشل میڈیا پر تیزی سے وائرل ہونے والی اس موبائل فون سے بنی ہوئی ویڈیو میں دیکھا جا سکتا ہے کہ اسلام آباد پولیس کی نیلی شرٹ اور گلے میں رومال ڈالے ایک اہلکار نے سڑک پر ایک کار سوار شہری کو روکا، جہاں اس اہلکار نے قانونی اقدام کرنے کے بجائے گاڑی کی کھڑکی پر جھک کر رشوت کا مطالبہ شروع کردیا۔
ویڈیو میں اہلکار کو نہایت دوستانہ اور ’ہمدردانہ‘ انداز میں شہری سے مول بھاؤ کرتے ہوئے سنا جا سکتا ہے، جس میں اہلکار کہتا ہے کہ ’کوئی کھانا شانا کھلاؤ، بس تین چار ہزار دو، زیادہ نہیں، آپ بھائی ہو، ویسے تو چار ہزار روپے کا چالان بنتا ہے لیکن آپ مجھے تین ہزار دے دو، چلو کچھ نہیں ہوتا‘۔

اسلام آباد:بس تین چارہزاردوزیادہ نہیں آپ بھائی ہو،چارہزارکاچالان ہےآپ تین ہزاردےدو۔

وفاقی پولیس کےجوان کی شہری نےرشوت مانگتےہوےویڈیوبنالی۔ pic.twitter.com/DjoJGCuhWG

— Ali Imran Abbasi (@aliimranabbasi) September 9, 2026

ویڈیو کے مناظر میں واضح طور پر دیکھا جا سکتا ہے کہ پولیس اہلکار گاڑی میں بیٹھے ڈرائیور سے کاغذات چیک کرنے کے بعد اس کو واپس کر رہا ہے، ایک طرف وہ شہری کو بھائی کہہ کر رعایت دینے کا دلاسہ دے رہا ہے تو دوسری جانب رقم کی وصولی پر زور دے رہا ہے، تاہم، کار سوار شہری نے نہایت چالاکی سے اس تمام گفتگو اور رقم کے لین دین کے مطالبے کی ویڈیو اپنے موبائل کیمرے میں محفوظ کرلی، جو اب سوشل میڈیا کے تمام اہم پلیٹ فارمز پر وائرل ہوچکی ہے۔