عمران خان کی ہمشیرہ نورین نیازی کو ہسپتال لانے کے بعد وارڈ کو سیل کرنے کے الزامات

لاہور (قدرت روزنامہ)پاکستان تحریک انصاف کی جانب سے بانی چیئرمین عمران خان کی ہمشیرہ نورین نیازی کی اچانک طبیعت خراب ہونے اور انہیں ہسپتال منتقلی کے بعد پیش آنے والے ناخوشگوار واقعات پر شدید غم و غصے کا اظہار کرتے ہوئے اسے ظلم، جبر اور اخلاقی گراوٹ کی بدترین انتہا قرار دیا گیا ہے۔
پارٹی ترجمان اور قانونی ٹیم کی جانب سے جاری کردہ بیانات میں الزام عائد کیا گیا ہے کہ حکومت اور انتظامیہ انسانی تمام اخلاقی اقدار کو پامال کر رہی ہے، چیئرمین عمران خان کی بہن نورین نیازی کو اچانک دل کی شدید تکلیف لاحق ہوئی، جس کے بعد انہیں فوری طور پر طبی امداد کے لیے ہسپتال منتقل کیا گیا، تاہم ہسپتال پہنچنے کے بعد صورتحال انتہائی تشویشناک ہوگئی جب پولیس نے انتہائی سخت اقدامات کرتے ہوئے ان کے آئی سی یو اور وارڈ کے باہر تالے لگا دیئے اور اسے مکمل طور پر سیل کر دیا۔

ظلم جبر اور اخلاقی گراوٹ کی انتہا!

چئرمین عمران خان کی بہن نورین نیازی کو دل کی تکلیف ہوئی ان کو ہسپتال لایا گیا آئی سی یو کے باہر پولیس نے تالے لگا دئیے۔ فیملی کو نہیں ملنے دیا جارہا نہ ان کی خیریت بتائی جارہی۔
یہ بے شرمی کی انتہا ہے ایسی فسطائیت ایسی گھٹیا مخالفت تاریخ میں نہیں دیکھی ایک قومی لیڈر کی غیرسیاسی بہنوں کو ایک طرف ایک ماہ سے بے جرم قید رکھا ہوا دوسرا آج بیمار ہونے پر اخلاقی گراوٹ کی انتہا کردی گئی ہے۔

— PTI (@PTIofficial) October 28, 2026

پی ٹی آئی کا کہنا ہے کہ ناصرف یہ کہ ان کے اہل خانہ کو ان سے ملنے نہیں دیا جا رہا بلکہ ان کی صحت کے حوالے سے بھی کسی قسم کی کوئی مصدقہ یا تسلی بخش اطلاع فراہم کرنے سے گریز کیا جا رہا ہے، یہ بے شرمی اور فسطائیت کی وہ تاریخ ہے جو ماضی میں کبھی نہیں دیکھی گئی، ایک قومی لیڈر کی غیر سیاسی بہنوں کو پہلے ہی طویل عرصے سے بغیر کسی ٹھوس جرم کے قید رکھا گیا ہے، اور اب جب وہ شدید علالت کے باعث ہسپتال کے بستر پر ہیں، تب بھی ان کے ساتھ اس قدر غیر انسانی سلوک روا رکھا جا رہا ہے۔

وکلاء کے مطابق نورین نیازی تاحال اسپتال میں زیر علاج ہیں۔ کل سے انکے وارڈ کو سیل کر کے رکھا گیا ہے۔

ابھی تک اہلِ خانہ کو نہ ان کی صحت کے بارے میں کوئی اطلاع نہیں دی جا رہی ہے اور نہ ہی اب تک ان کی بیٹی ہاجرہ کو ان سے ملاقات کی اجازت دی گئی ہے۔

— Muhammad Umair (@MohUmair87) October 29, 2026

عمران خان کی فیملی کے وکلاء نے تصدیق کی ہے کہ نورین نیازی تاحال ہسپتال میں زیرِ علاج ہیں لیکن ان کی بیٹی ہاجرہ سمیت کسی بھی قریبی عزیز کو ان سے ملاقات کی اجازت نہیں دی جا رہی، جس سے پورے خاندان میں شدید بے چینی پائی جاتی ہے، بیماری اور علاج کے معاملے پر اس قسم کی سختی اور سیاسی انتقام کا نشانہ بنانا بنیادی انسانی حقوق کی سنگین خلاف ورزی ہے، فوری طور پر نورین نیازی کے اہل خانہ کو ان سے ملاقات کی اجازت دی جائے اور ان کی صحت کے بارے میں حقائق کو چھپانے کا سلسلہ بند کیا جائے۔