پاکستان کا بھلا کرنا ہے تو سیاسی پارہ نیچے لایا جائے، ایک دوسرے کیلئے آسانیاں پیدا کی جائیں، خواجہ سعد رفیق
قوم کے مستقبل کا فیصلہ بااختیار پارلیمنٹ کرے، جسے عوام کے ساتھ ریاستی اداروں کی حمایت حاصل ہو، پی ٹی آئی سمیت تمام جماعتوں سے مقتدرہ کے تعلقات نارملائز ہونے میں ریاست کا مفاد ہے؛ سابق وفاقی وزیر کا مشورہ

لاہور(قدرت روزنامہ)پاکستان مسلم لیگ ن کے سینئر رہنما اور سابق وفاقی وزیر خواجہ سعد رفیق نے خبردار کیا ہے کہ مقتدرہ، حکومت اور جمعیت علمائے اسلام ف کے درمیان تنازعے کا مزید سنگین ہونا وطنِ عزیز کیلئے سخت نقصان کا باعث ہوگا، ابھی بات بہت دور نہیں گئی، معاملات کو سمیٹ لینا اور سیاسی درجہ حرارت کو نیچے لانا ہی ملک و قوم کے بہترین مفاد میں ہے۔
سماجی رابطے کی ویب سائٹ ایکس پر اپنے ایک تفصیلی پیغام میں قومی سلامتی کے چیلنجز پر روشنی ڈالتے ہوئے انہوں نے لکھا کہ تمام تر فکری و نظریاتی فاصلوں کے باوجود ہمارے بیرونی دشمنوں کی پشت پناہی سے ٹی ٹی پی اور بی ایل اے پاکستانی ریاست کے خلاف اسٹریٹجک الائنس بنا چکے ہیں، دہشتگردی کے اس عفریت سے نجات کیلئے افواجِ پاکستان، سکیورٹی اداروں اور عوام نے بیش بہا قربانیاں دی ہیں اور ابھی یہ جنگ پورے زور و شور سے جاری ہے، جس میں آئے روز سکیورٹی اداروں کے جوان، افسران اور عام شہری شہادتوں کے نذرانے پیش کر رہے ہیں۔
آواز ِ دروں —•—
مقتدرہ ، حکومت اور جےیو آئ کے بیچ تنازعے کا مزید سنگین ھونا وطن ِ عزیز کیلئے سخت نقصان کا باعث ھو گا ، ابھی بات بہت دور نہیں گىئ ، اسے سمیٹ لینا زیادہ بہتر ھے ۔۔
تمام تر فکری و نظریاتی فاصلے کے باوجود ھمارے بیرونی دشمنوں کی پشت پناھی سے TTP اور BLA پاکستانی ریاست کیخلاف سٹریٹجک الائینس بنا چکے ھیں ،
دھشت گردی کے عفریت سے نجات کیلئے افواج ، سیکیورٹی اداروں اور عوام نے بیش بہا قربانیاں دی ھیں اور ابھی یہ جنگ پورے زور و شور سے جاری ھے ، آۓ روز سیکیورٹی اداروں کے جوان ، افسران اور عوام شھادتوں کے نذرانے پیش کر رھے ھیںجناب مولانا فضل الرحمٰن ، انکا خاندان ، جماعت اور اکابر علما TTP کے نشانے پر ھیں ، جے یو آئ کے متعدد اکابر علما خود کش حملوں میں شھادت کا رتبہ حاصل کر چکے ھیں ، خود مولانا پر کىئ خود کش حملے ھو چکے ھیں
ٹی ٹی پی دیو بندی مکتبۂِ فکر کی سب سے بڑی جماعت ھونے کے ناطے جمیعت العلماۓ اسلام کو پاکستان میں اپنے راستے کی سب سے بڑی نظریاتی و سیاسی رکاوٹ سمجھتی ھے
بیرونی سرپرستی اور سرماۓ سے ریاست کیخلاف مسلح جدوجہد میں مصروف گروپس TTP ھوں یا BLA یا کوئ اور ، پاکستان کے آئین اور پرچم کو ماننے والی تمام نمائیندہ قوتیں داخلی سیاسی اختلافات کے باوجود ریاست کے ساتھ کھڑی رھنی چاھئیں اور مقتدرہ سے انکا جھگڑا ختم ھونا چاھئیے ، یہی پاکستان کی سلامتی کا راستہ ھے
سیاسی حقیقتیں دباؤ میں لائ جا سکتی ھیں لیکن سختی سے ختم نہیں ھوتیں ، اسی طرح سیاسی قوتوں اور مقتدرہ کی لڑائ میں ھمیشہ نقصان پاکستان ھی کا ھوا ھے ، تاریخ کا سبق یہی ھے
پاکستان کے بیرونی و اندرونی دشمنوں کو ناکام کرنے ، دھشت گردی کے خاتمے ، بدترین معاشی بدحالی سے نکلنے ، فرسودہ و ناکارہ طرز ِ حکمرانی سے نجات اور سیاسی بحرانوں کے خاتمے کیلئے تمام ریاستی اور سیاسی قوتوں کو اختلافات کے باوجود اکٹھے ھونا ھوگا ، ایک دوسرے کی کڑوی کسیلی بات سن کر تحفظات دور کرنا اور قوم کو مشترکہ لائحہ عمل دینا ھو گا ۔
پی ٹی آئ اور جے یو آئ سمیت تمام قومی ، علاقائ ، سیاسی و مذھبی جماعتوں ، سوچوں کے ساتھ مقتدرہ کے تعلقات نارملائز ھونے میں ھی ریاست کا مفاد کارفرما ھے
مقتدرہ کی اتحادی حکومتی جماعتوں کو خاموش رھنے یا ھچکچاھٹ کی بجاۓ اس ضمن میں پُل کا کردار ادا کرنا چاھئیے ،
یقین ھونا چاھئیے کہ کار ِخیر اور نیک نیتی کبھی رائگاں نہیں جاتے ۔۔
پاکستان کا بھلا کرنا مقصود ھے تو سیاسی پارہ نیچے لایا جاۓ ، ایک دوسرے کیلئے آسانیاں پیدا کی جائیں ، بات چیت کے ذریعے راستے نکالے جائیں
قوم کے مستقبل کا فیصلہ بااختیار پارلیمنٹ کرے جسے عوام کے ساتھ ریاستی اداروں کی حمایت حاصل ھو
موج بڑھے یا آندھی آۓ دیا جلاۓ رکھنا ھے
گھر کی خاطر سو دکھ جھیلیں ، گھر تو آخر اپنا ھے— Khawaja Saad Rafique (@KhSaad_Rafique) November 15, 2026
سابق وفاقی وزیر نے جے یو آئی کے سربراہ مولانا فضل الرحمان کی قربانیوں کا ذکر کرتے ہوئے کہا کہ مولانا فضل الرحمان، ان کا خاندان، جماعت اور اکابر علماء خود ٹی ٹی پی کے نشانے پر ہیں، جے یو آئی کے متعدد اکابر علماء خودکش حملوں میں شہادت کا رتبہ حاصل کرچکے ہیں اور خود مولانا پر کئی خودکش حملے ہو چکے ہیں، دیوبندی مکتبۂ فکر کی سب سے بڑی جماعت ہونے کے ناطے ٹی ٹی پی جمعیت علمائے اسلام کو پاکستان میں اپنے راستے کی سب سے بڑی نظریاتی و سیاسی رکاوٹ سمجھتی ہے۔
خواجہ سعد رفیق نے واضح کیا کہ بیرونی سرپرستی اور سرمائے سے ریاست کے خلاف مسلح جدوجہد میں مصروف گروپس چاہے ٹی ٹی پی ہوں یا بی ایل اے ان کے مقابلے میں پاکستان کے آئین اور پرچم کو ماننے والی تمام نمائندہ قوتوں کو داخلی سیاسی اختلافات کے باوجود ریاست کے ساتھ کھڑا رہنا چاہیئے اور مقتدرہ سے ان کا جھگڑا ختم ہونا چاہیئے، سیاسی حقیقتیں دباؤ میں تو لائی جا سکتی ہیں لیکن سختی سے ختم نہیں ہوتیں اور تاریخ کا سبق یہی ہے کہ سیاسی قوتوں اور مقتدرہ کی لڑائی میں ہمیشہ نقصان پاکستان ہی کا ہوا ہے۔
لیگی رہنما نے تجویز دی کہ بیرونی و اندرونی دشمنوں کو ناکام کرنے، دہشتگردی کے خاتمے، بدترین معاشی بدحالی سے نکلنے، فرسودہ طرزِ حکمرانی سے نجات اور سیاسی بحرانوں کے خاتمے کے لیے تمام ریاستی اور سیاسی قوتوں کو اکٹھا ہونا ہوگا، پی ٹی آئی اور جے یو آئی سمیت تمام قومی، علاقائی، سیاسی و مذہبی جماعتوں کے ساتھ مقتدرہ کے تعلقات نارملائز ہونے میں ہی ریاست کا مفاد کارفرما ہے، مقتدرہ کی اتحادی حکومتی جماعتیں خاموش رہنے یا ہچکچاہٹ کے بجائے اس ضمن میں پُل کا کردار ادا کریں اور بات چیت کے ذریعے راستے نکالیں۔
اپنے پیغام کے اختتام پر خواجہ سعد رفیق نے کہا کہ قوم کے مستقبل کا فیصلہ ایک ایسی بااختیار پارلیمنٹ کو کرنا چاہیے جسے عوام کے ساتھ ساتھ ریاستی اداروں کی مکمل حمایت حاصل ہو، سابق وفاقی وزیر نے اس شعر کے ساتھ اپنی بات مکمل کی کہ
موج بڑھے یا آندھی آئے دیا جلائے رکھنا ہے
گھر کی خاطر سو دکھ جھیلیں، گھر تو آخر اپنا ہے
