11 جون سے ظالمانہ مہنگائی کے خلاف تحریک کا آغاز کر رہے ہیں، سراج الحق

اسلام آباد (قدرت روزنامہ)امیر جماعت اسلامی سراج الحق نے کہا ہے کہ 11 جون سے ظالمانہ مہنگائی کے خلاف تحریک کا آغاز کر رہے ہیں . سراج الحق نے اپنے بیان میں کہا کہ حکومت نے پیٹرول اور بجلی کی قیمتوں میں اضافہ کر کے پورے ملک میں ماتم برپا کر دیا ہے، قوم استعماری طاقتوں اور عالمی مالیاتی اداروں کی غلامی میں پس رہی ہے .

ان کا کہنا تھا کہ حکمران اپنی مراعات میں کمی کو تیار نہیں، سارا زور عوام کا خون نچوڑنے پر ہے، غریب کا بچہ بھوکا سوتا ہے، لوگوں کے پاس علاج کے لیے وسائل نہیں .
انہوں نے کہا کہ حکمرانوں کے محلات میں چار چار سرکاری گاڑیاں کھڑی ہیں، قوم فاقوں میں مر رہی ہے جبکہ دوسری طرف شاپنگ مالز کے باہر سرکاری گاڑیوں کی قطاریں نظر آتی ہیں .
امیر جماعت اسلامی کا کہنا تھا کہ حکمران اشرافیہ قومی خزانے سے بیرون ملک اپنی فیملیز سے ملاقاتیں کرتے ہیں . انہوں نے مزید کہا کہ 11جون سے کرپٹ سودی نظام اور ظالمانہ مہنگائی کے خلاف تحریک کا آغاز کر رہے ہیں، قوم سے اپیل کرتے ہیں کہ وہ ساتھ دیں اور تحریک کا حصہ بنیں .