بھارت کیخلاف میچ کیلئے ذہن میں 11 کھلاڑی ہیں پر فائنل نہیں، بابر اعظم

میلبرن (قدرت روزنامہ)پاکستان کرکٹ ٹیم کے کپتان بابر اعظم نے کہا ہے کہ بھارت کے خلاف میچ کے لیے ذہن میں تو 11 موجود ہیں لیکن کنڈیشن دیکھ کر اس کو فائنل کریں گے۔میلبرن میں پریس کانفرنس کرتے ہوئے بابر اعظم نے کہا کہ موسم ہمارے ہاتھ میں نہیں ہے، بطور کپتان یہی چاہوں گا کہ پورا میچ ہو کیونکہ ہر کوئی میچ کا منتظر ہے۔
بابر اعظم نے کہا کہ جو بھی صورتحال ہو ہم تیار ہیں اور اپنا سو فیصد دیں گے، ہمارا پیس اٹیک جس طرح پرفارم کررہا ہے وہ کافی اعتماد کی بات ہے۔
انہوں نے کہا کہ شان مسعود فٹ ہیں، ان کے ٹیسٹ کلیئر ہیں اور کل کیلئے ریڈی ہیں جبکہ فخر زمان مکمل فٹ نہیں ہوئے، وہ پہلے میچ کیلئے دستیاب نہیں ہوں گے، وکٹ نہیں دیکھی اس کے بعد ٹیم کا فیصلہ کریں گے۔بابر اعظم نے کہا کہ شاداب اور نواز اہم ستون اور ہمارے لیے پلس پوائنٹ ہیں، حارث رؤف یہاں بگ بیش کھیلا ہے، اس نے یہاں کے بارے میں کافی بتایا ہے۔
کپتان نے مزید کہا کہ آف دا فیلڈ ہر پلیئر کے ساتھ اچھے تعلقات ہیں، بطور اسپورٹس مین ہماری یہی ذمہ داری ہے کہ سب سے اچھے طریقے سے ملیں۔بابر اعظم نے کہا کہ کوشش کریں گے کہ گراؤنڈ میں اپنا سو فیصد دیں، ہر پلیئر کو ذہن میں رکھ کر پلان کرتے ہیں۔
پاکستان کرکٹ ٹیم کے کپتان نے کہا کہ یہاں بڑے شاٹس نہیں لگتے بھاگ کر جتنا زیادہ رنز کریں گے اتنا فائدہ ہوگا، ٹی ٹوئنٹی میں کسی بھی ٹیم کو آسان نہیں سمجھ سکتے۔بابر اعظم نے کہا کہ مختصر فارمیٹ میں کسی ٹیم کے پاس غلطی کی گنجائش نہیں ہوتی، ٹی ٹوئنٹی میں کسی بھی دن کوئی بھی پلیئر میچ جتوا سکتا ہے۔واضح رہے کہ ٹی ٹوئنٹی ورلڈ کپ میں کل پاکستان اور بھارت کا میچ میلبرن میں شیڈول ہے۔