فخر ہے میری موت کے ڈرامے سے سروائیکل کینسر کو اسپاٹ لائٹ ملی، پونم پانڈے
ممبئی(قدرت روزنامہ)بھارتی اداکارہ و ماڈل پونم پانڈے نے کہا ہے کہ اُنہیں فخر ہے کہ اُن کی موت کے ڈرامے سے سروائیکل کینسر کو اسپاٹ لائٹ ملی۔2 فروری کی صبح پونم پانڈے کے آفیشل انسٹاگرام پر ایک پوسٹ شیئر کی گئی تھی جس میں کہا گیا تھا کہ سروائیکل کینسر کی وجہ سے اداکارہ کی موت ہوگئی ہے۔
پونم پانڈے کی اچانک موت پر بھارتی شوبز انڈسٹری کو گہرا صدمہ پہنچا تھا جبکہ مداحوں کی جانب سے بھی اداکارہ کی موت پر افسوس کا اظہار کیا جارہا تھا۔
موت کی خبر کے ایک دن بعد پونم پانڈے منظرِ عام پر آگئیں اور سوشل میڈیا پر اپنا ویڈیو پیغام جاری کرکے بتایا کہ وہ زندہ ہیں اور بالکل ٹھیک ہیں، اداکارہ کے مطابق اُنہوں نے یہ ڈراما سروائیکل کینسر کی ویکسین کی تشہیری مہم کے لیے کیا۔
پونم پانڈے نے اپنے ویڈیو پیغام میں کہا کہ “میں معافی چاہتی ہوں کہ میری موت کی جھوٹی خبر نے سب کو غمگین کیا اور میں ان لوگوں سے بھی معذرت خواہ ہوں جن کی میری وجہ سے دل آزاری ہوئی”۔اداکارہ نے کہا کہ “میرا مقصد سروائیکل کینسر کے بارے میں آگاہی پھیلانا تھا کیونکہ کوئی بھی اس خاموش مرض کے بارے میں بات نہیں کرتا، اس مرض کے بارے میں بات کرنا بہت ضروری تھا”۔
اُنہوں نے کہا کہ “یہ ایک ایسی بیماری ہے جو خاموشی سے آپ کی جان لے لیتی ہے لہٰذا ہمیں اس بیماری کو فوری طور پر اسپاٹ لائٹ پر لانے کی ضرورت ہے”۔
پونم پانڈے نے مزید کہا کہ “مجھے فخر ہے کہ میری موت کے ڈرامے سے سروائیکل کینسر کو اسپاٹ لائٹ ملی، میرا مقصد پورا ہوگیا”۔
واضح رہے کہ پونم پانڈے کے اس ڈرامے کے بعد سوشل میڈیا صارفین کی جانب سے مطالبہ کیا جارہا ہے کہ جلد از جلد اداکارہ کے خلاف مقدمہ درج کیا جائے کیونکہ انہوں نے موت کا مذاق بنایا ہے۔