اننت امبانی کی شادی میں پرفارمنس کیلئے جسٹن بیبر کی ممبئی آمد
ممبئی(قدرت روزنامہ) ایشیا کے امیر ترین شخص بھارتی بزنس ٹائیکون مکیش امبانی کے بیٹے اننت امبانی کی شادی میں پرفارم کرنے کے لیے عالمی شہرت یافتہ کینیڈین پاپ اسٹار جسٹن بیبر بھارت پہنچ گئے۔
بھارتی میڈیا کے مطابق پاپ اسٹار جسٹن بیبر آج یعنی 4 جولائی کی صبح ممبئی پہنچے ہیں، وہ اننت امبانی اور رادھیکا مرچنٹ کی سب سے بڑی اور مہنگی ترین شادی میں پرفارم کریں گے۔
رپورٹ میں بتایا گیا کہ 5 جولائی کو اننت امبانی اور رادھیکا مرچنٹ کے سنگیت کی تقریب منعقد ہوگی جس میں جسٹن بیبر اپنی شاندار پرفارمنس کا جادو دکھائیں گے۔
کہا جارہا ہے کہ جسٹن بیبر کے علاوہ بھی دیگر بین الاقوامی گلوکار شادی کی تقریب میں پرفارم کریں گے جن میں برطانوی گلوکارہ اڈیل، کینیڈین ریپر ڈریک اور امریکی گلوکارہ لانا ڈیل رے شامل ہیں۔ بھارتی میڈیا کا کہنا ہے کہ اننت امبانی اور رادھیکا مرچنٹ کی شادی 12 جولائی کو ہوگی جبکہ اس جوڑے کی شادی کی تقریبات کا سلسلہ 14 جولائی تک جاری رہے گا۔
View this post on Instagram
واضح رہے کہ رواں سال مارچ میں مکیش امبانی نے اپنے سب سے چھوٹے بیٹے اننت امبانی اور اُن کی منگیتر رادھیکا مرچنٹ کے لیے تین روزہ پری ویڈنگ تقریبات کا انعقاد کیا تھا، یہ تمام تقریبات بھارتی ریاست گجرات کے شہر جام نگر میں منعقد ہوئی تھیں۔
اننت امبانی اور رادھیکا مرچنٹ کی پری ویڈنگ تقریبات میں دنیا بھر کی چند بااثر شخصیات اور نامور بالی ووڈ ستاروں نے شرکت کی تھی جن میں سماجی، سیاست، کاروباری، شوبز اور کھیلوں کی دنیا کی معروف شخصیات شامل تھیں
اس کے علاوہ اننت امبانی اور رادھیکا مرچنٹ کی شادی کا دوسرا جشن 29 مئی سے یکم جون تک اٹلی اور جنوبی فرانس میں کروز پر منایا گیا تھا جبکہ امبانی خاندان نے اننت اور رادھیکا کی شادی سے قبل 50 غریب جوڑوں کی شادی بھی کروائی۔