اداکار سہیل خان نے اپنی دکان تقریباً 17 لاکھ روپے ماہانہ کرائے پر دے دی

ممبئی (قدرت روزنامہ) بالی وڈ اداکار سہیل خان نے ممبئی کے پوش علاقے باندرہ میں واقع اپنی کمرشل پراپرٹی “گاسپر انکلیو” میں ایک دکان معروف کمپنی “دی آئرش ہاؤس فوڈ اینڈ بیوریجز پرائیویٹ لمیٹڈ” کو کرائے پر دے دی ہے۔ اس معاہدے کے تحت سہیل خان کو ہر ماہ 16 لاکھ 89 ہزار روپے کرایہ ملے گا۔ انہیں پانچ سال میں مجموعی طور پر تقریباً 10 کروڑ 30 لاکھ روپے کی آمدنی ہوگی۔
ہندوستان ٹائمز کے مطابق یہ معاہدہ مارچ 2025 میں رجسٹر کیا گیا جس میں دکان کا تعمیر شدہ رقبہ تقریباً 1290 مربع فٹ ہے۔ معاہدے کے تحت 60 لاکھ روپے بطور سیکیورٹی ڈپازٹ بھی لیے گئے ہیں۔ کرایے میں باقاعدہ اضافہ بھی شامل ہے جہاں ابتدائی 36 ماہ کے لیے ماہانہ کرایہ 16.89 لاکھ روپے مقرر ہے جو اگلے 24 ماہ کے لیے بڑھا کر 17.73 لاکھ روپے کر دیا جائے گا۔ یہ دکان سہیل خان نے اپریل 2009 میں تین کروڑ 11 لاکھ روپے میں خریدی تھی۔

باندرہ ممبئی کا ایک اہم اور مہنگا علاقہ مانا جاتا ہے، جہاں کئی فلمی شخصیات، پرتعیش ریذیڈنشل پروجیکٹس اور مشہور ریستوران واقع ہیں۔