پسنی فش ہاربر اتھارٹی میں منیجنگ ڈائریکٹر کی پوسٹ خالی، تنخواہ اور پنشن میں تاخیر

پسنی(قدرت روزنامہ)پسنی فش ہاربر اتھارٹی میں گزشتہ ڈیڑھ سال سے منیجنگ ڈائریکٹر کی پوسٹ خالی، درجنوں ریٹائرڈ ملازمین کے پے اینڈ پنشن کے کیسز التواءکا شکار ، ملازمین کو تنخواہوں کی مد میں صوبائی حکومت کی جانب سے دیا گیا سالانہ گرانٹ بھی ختم ہو گئی، ریٹائرمنٹ ہونے والے اور حاضر سروس ملازمین مشکلات سے دوچار تفصیلات کے مطابق پسنی فش ہاربر اتھارٹی جو ماضی میں ایک منافع بخش ادارہ تھا، مول ہولڈنگ ٹیکس کی مد میں نہ صرف ملازمین کی تنخواہیں ادا کی جاتی تھی بلکہ قومی خزانے کو بھی ماہانہ لاکھوں روپے زرمبادلہ حاصل ہوتی تھی ، جیٹی کی زبوں حالی سے نہ صرف علاقے کی معیشت پر برے اثرات مرتب ہو گئے ہیں اور اب فش ہاربر اتھارٹی کے ملازمین کی تنخواہوں کی ادائیگی بھی صوبائی حکومت کے گرانٹ پر منحصر ہے، صوبائی حکومت کی جانب سے فش ہاربر اتھارٹی کے ملازمین کو تنخواہوں کی مد میں جون 2023 کو پندرہ کروڑ نوے لاکھ روپے کا گرانٹ جاری کیا گیا تھا جو اسی مہینے ختم ہو گئی ہے، دوسری طرف پچھلے ڈیڑھ سال سے فش ہاربر اتھارٹی میں مینیجنگ ڈائریکٹر کی تعیناتی نہیں ہو سکی ہے اور ایم ڈی کی پوسٹ خالی ہونے سے اسی دوران اتھارٹی کے ریٹائرمنٹ ہونے والے ملازمین پے اینڈ پنشن کے درجنوں کیسز زیر التوا ہیں اور ریٹائرمنٹ ہونے والے ملازمین رل گئے ہیں، دریں اثنا ملازمین کی تنخواہوں کا گرانٹ ختم ہونے کے بعد اب ایک مرتبہ پھر ملازمین فاقہ کشی کا شکار ہوں گے۔