جعلی وزرا کی علی امین گنڈاپور اور افغان قونصل جنرل کی ملاقات پر تنقید مضحکہ خیز ہے، بیرسٹر ڈاکٹر سیف

لاہور (قدرت روزنامہ)مشیر اطلاعات خیبر پختونخوا بیرسٹر ڈاکٹر سیف نے کہا ہے کہ جعلی وزراء یا تو آئین سے بلکل نابلد ہے اور یا عوام کی آنکھوں میں دھول جونکھنے کی ناکام کوشش کررہے ہیں . جعلی وفاقی و صوبائی وزراء کی علی امین گنڈاپور اور افغان قونصل جنرل کی ملاقات پر تنقید مضحکہ خیز ہے .

مشیر اطلاعات کا اپنے بیان میں کہنا تھا کہ جعلی وزراء کی خدمت میں عرض ہے کہ 18ویں ترمیم کے بعد وزیراعلیٰ غیرملکی دورے اور معاہدے بھی کر سکتے ہیں . جعلی وزراء یہ بھی بھول گئے کہ شہباز شریف نے بحیثیت وزیر اعلیٰ مختلف ممالک کے دورے کیا کرتے تھے . ان دوروں میں شہباز شریف نے تجارتی معاہدے بھی کیے اور ان میں خوب کمیشن بھی کمایا . بیرسٹر ڈاکٹر سیف نے کہا کہ تنقید کرنے والے یہ بھی بتائیں کہ راج کماری مریم نواز نے بطور وزیراعلیٰ کتنے سفرا سے ملاقاتیں کیں . وزیراعلیٰ علی امین گنڈاپور نے پہلے بھی غیر ملکی سفرا اور قونصل جنرلز سے ملاقاتیں کیں اور آئندہ بھی کریں گے . ان کا کہنا تھا کہ ہم افغانستان کے ساتھ بہتر سماجی اور تجارتی روابط کو فروغ دینا چاہتے ہیں . افغان قونصل جنرل سے ملاقات میں بھی علاقائی امن اور باہمی تجارت پر بات ہوئی ہے . . .