ڈاکٹروں نے مولانا فضل الرحمان کو آرام کا مشورہ کیوں دیا؟

اسلام آباد (قدرت روزنامہ)بیمار ہونے کے باعث جمعیت علما اسلام کے سربراہ مولانا فضل الرحمان کو ڈاکٹروں نے مکمل آرام کا مشورہ دیا ہے، جس کے بعد انہوں نے اپنی تمام سرگرمیاں موخر کردی ہیں۔
میڈیا رپورٹس کے مطابق کئی دنوں سے مولانا فضل الرحمان کی نقل وحرکت انتہائی محدود ہوگئی ہے کیونکہ انہیں پاؤں میں شدید تکلیف کا سامنا ہے جس کے باعث انہیں مکمل آرام کی ہدایت کی گئی ہے۔
روزنامہ جنگ کی رپورٹ کے مطابق مولانا فضل الرحمان گزشتہ ہفتے وزیراعظم شہباز شریف سے ملاقات کے لیے وزیراعظم ہاؤس گئے تھے، جہاں سے واپسی پر ان کے پاؤں میں تکلیف شروع ہوگئی تھی، ان کا بایاں پاؤں سوج چکا تھا اور انگلیاں نیلی پڑ گئیں تھیں۔
ڈاکٹرز نے ہنگامی طور پر ابتدائی طبی معائنے کے بعد انہیں ادویات تجویز کرتے ہوئے چلنے پھرنے سے پرہیز اور مکمل آرام کا مشورہ دیا ہے، یہی وجہ ہے کہ انہوں نے اپنی سیاسی سرگرمیاں فی الحال ملتوی کردی ہیں۔