پاکستان کے لیے جاسوسی کے الزام میں معروف بھارتی یوٹیوبر جیوتی ملہوترا گرفتار

ممبئی(قدرت روزنامہ)بھارتی ریاست ہریانہ سے تعلق رکھنے والی بھارتی یوٹیوبر جیوتی مہلوترا سمیت 6 افراد کو پاکستان کے لیے جاسوسی کے الزام میں گرفتار کرلیا گیا ہے، جیوتی ملہوترا 2023 میں پاکستان کا دورہ کرچکی ہیں۔
بھارتی میڈیا کے مطابق ہریانہ اور پنجاب سے مجموعی طور پر 6 افراد کو پاکستان کے لیے جاسوسی کے الزام میں گرفتار کیا گیا ہے جن میں ہریانہ سے تعلق رکھنے والی یوٹیوبر اور ٹریول ولاگر جیوتی ملہوترا بھی شامل ہیں، ان لوگوں پر الزام ہے کہ انہوں نے پاکستانی خفیہ ایجنسی، ایجنٹوں اور مخبروں کو حساس معلومات دی ہیں۔
رپورٹس کے مطابق تحریری جواب کے بعد جیوتی کا کیس اکنامک آفینسز ونگ کے سپرد کردیا گیا، یہ دعویٰ کیا گیا ہے کہ دوسال پہلے جیوتی پاکستان گئی جہاں اس کا دانش کے ساتھ رابطہ ہوا تھا جو نئی دہلی میں پاکستانی ہائی کمیشن میں اپنی خدمات سرانجام دے رہاتھا، اسی شخص نے مبینہ طورپر جیوتی کو مختلف پاکستانی لوگوں سے ملوایا جس کے بعد وہ انڈونیشیا بھی گئی ہیں۔
یہ بھی الزام لگایا گیا ہے کہ جیوتی نے سوشل میڈیا پر پاکستان کا مثبت چہرہ پیش کیا۔
یاد رہے کہ گزشتہ دنوں بھارتی میڈیا کی جانب سے بھارتی پنجاب میں 2 افراد کو مبینہ طور پر پاکستان کے لیے جاسوسی کے الزام میں گرفتار کرنے کا دعویٰ کیا تھا۔
بھارتی میڈیا نے دعویٰ کیا تھا کہ پنجاب سے گرفتار ہونے والے 2 افراد پر پاکستانی ہائی کمیشن کے ایک اہلکار کے لیے جاسوسی کا الزام ہے، ایک ملزم پر بھارتی فوج کی نقل و حرکت کی معلومات لیک کرنے کا الزام ہے۔
بھارتی میڈیا نے بتایا تھا کہ جاسوسی کے الزام میں گرفتار2 افراد میں ایک خاتون بھی شامل ہے۔