آغاز حقوق بلوچستان پیکج میں انوکھے انکشافات، اکاﺅنٹنٹ محمد عبدالقدوس نے اسکالرز شپ منسوخ کردیے
(قدرت روزنامہ)بلوچستان میں “آغاز حقوق بلوچستان پیکج” کے تحت دی جانے والی اسکالرشپس کے حوالے سے ایک اہم انکشاف سامنے آیا ہے۔ رپورٹ کے مطابق، اکاؤنٹنٹ محمد عبدالقدوس نے متعدد طلبہ کی اسکالرشپس منسوخ کر دی ہیں، جو کہ ان کے اختیارات سے تجاوز کے مترادف ہے۔ طلبہ کی جانب سے فراہم کردہ دستاویزات سے یہ بات سامنے آئی ہے کہ اسکالرشپس کی منسوخی کا فیصلہ اکاؤنٹنٹ نے خود کیا، حالانکہ یہ اختیار ان کے دائرہ کار میں نہیں آتا۔
طلبہ نے اس اقدام کو غیر قانونی قرار دیتے ہوئے سول کورٹ میں مقدمہ دائر کرنے کا اعلان کیا ہے اور مطالبہ کیا ہے کہ انہیں ہونے والے نقصان کا ازالہ کیا جائے۔ اس کے ساتھ ہی، انہوں نے صدر پاکستان آصف زرداری، چیئرمین ہائر ایجوکیشن کمیشن (ایچ ای سی)، وزیر تعلیم اور وزیراعلیٰ بلوچستان سرفراز بگٹی سے مطالبہ کیا ہے کہ محمد عبدالقدوس کے خلاف انکوائری کی جائے اور ان کے خلاف سخت کارروائی عمل میں لائی جائے۔
واضح رہے کہ اس سے قبل بھی مختلف میڈیا ہاؤسز نے اس پراجیکٹ کے حوالے سے ایچ ای سی سے معلومات طلب کی تھیں، لیکن سات ماہ گزرنے کے باوجود ایچ ای سی کی جانب سے کوئی جواب موصول نہیں ہوا۔
یہ واقعہ بلوچستان میں تعلیمی وظائف کی شفافیت اور نگرانی کے نظام پر سوالات اٹھاتا ہے، اور متعلقہ اداروں سے فوری اور مؤثر اقدامات کی ضرورت کو اجاگر کرتا ہے۔
