کوئٹہ اسمال انڈسٹریز کے صدر کی عمانی قونصل جنرل سے ملاقات، بلوچستان میں سرمایہ کاری اور تجارتی مواقعوں کے فروغ پر اتفاق
کراچی(قدرت روزنامہ)وفاقی جمہوریہ جرمنی کے بلوچستان کے لیے اعزازی قونصل اور کوئٹہ چیمبر آف اسمال انڈسٹری کے صدر نے انجینئر سمیع عبداللہ الخنجری، قونصل جنرل سلطنت عمان سے عمانی قونصل خانے کراچی میں ملاقات کی۔ اس ملاقات کا مقصد عمان اور بلوچستان کے درمیان تعاون کو فروغ دینا تھا۔ اس نتیجہ خیز ملاقات میں کئی اہم امور پر تبادلہ خیال ہوا، جن میں علاقائی روابط، تجارتی ترقی اور ثقافتی ورثے کا تحفظ شامل تھا۔ گفتگو کے اہم نکات میں کوئٹہ سے مسقط کے لیے سلام ایئر کی پروازوں کے آغاز کی تجویز پیش کی گئی، جسے مستقبل میں دیگر بین الاقوامی مقامات تک وسعت دی جاسکتی ہے۔ یہ اقدام بلوچستان کے عوام اور کاروباری طبقے کے لیے عالمی سطح پر رسائی کو بہتر بنائے گا۔ بلوچستان کے تاجروں کا ایک وفد عمان بھیجنے پر اتفاق ہوا تاکہ وہ سرمایہ کاری اور تجارتی مواقع کا جائزہ لے سکیں اور دو طرفہ کاروباری شراکت داری کو فروغ دے سکیں۔ قونصل جنرل نے بلوچستان کے کاروباری افراد کے لیے بزنس ویزا کے اجرا کو آسان بنانے کی یقین دہانی کرائی، تاکہ وہ عمانی منڈیوں تک آسانی سے رسائی حاصل کرسکیں۔ گوادر کی تاریخی عمارات کے تحفظ اور بحالی کے حوالے سے تعاون پر زور دیا گیا، جو کہ اس خطے کی ثقافتی اہمیت اور مستقبل کی معاشی ترقی کا اہم جزو ہے۔ عمان کی کمیونٹی کا ایک وفد بلوچستان کا دورہ کرے گا تاکہ وہ وہاں دستیاب کاروباری مواقع کا مشاہدہ کرسکے اور عوامی و ثقافتی روابط کو فروغ دیا جاسکے۔ قونصل جنرل سمیع عبداللہ الخنجری نے بلوچستان میں جرمنی کی ترقیاتی کوششوں، خاص طور پر معیشت کے فروغ اور ثقافتی ورثے کے تحفظ کے حوالے سے کردار کو سراہا۔ یہ ملاقات عمان اور بلوچستان کے درمیان سفارتی، تجارتی، اور ثقافتی تعلقات کو مزید مستحکم کرنے کی جانب ایک اہم قدم ہے، اور عالمی سطح پر بلوچستان کے روابط کو وسعت دینے کے نئے امکانات پیدا کرتی ہے۔
