سندھ کی کردار کشی کے پیچھے منظم سازش، کچھ قوتیں وسائل پر ڈاکا ڈالنے کے لیے کام نہ کرنے کا بیانیہ بناتی ہیں، بلاول بھٹو

مٹھی(قدرت روزنامہ)پاکستان پیپلز پارٹی (پی پی پی) کے چیئرمین بلاول بھٹو زرداری نے کہا ہے کہ سندھ کی کردار کشی ایک سازش کے تحت کی جاتی ہے، تاہم اس جھوٹے بیانیے کا بہترین جواب تھرپارکر کی ترقی ہے۔
مٹھی میں خطاب کرتے ہوئے بلاول بھٹو نے کہاکہ کچھ قوتیں 18ویں ترمیم کے تحت دیے گئے اختیارات واپس لینا چاہتی ہیں، اور وسائل پر ڈاکا ڈالنے کا منصوبہ بنا رکھا ہے، اس کے لیے کام نہ کرنے کا جھوٹا بیانیہ بنایا جاتا ہے۔
انہوں نے کہاکہ تھر آنے پر ہمیشہ خوشی ہوتی ہے کیونکہ یہاں کے لوگ پیپلز پارٹی، بے نظیر بھٹو اور شہید بھٹو سے دل کی گہرائیوں سے محبت کرتے ہیں۔

تھر کے عوام پاکستان پیپلز پارٹی شہید محترمہ بینظیر بھٹو اور قائدِ عوام شہید ذوالفقار علی بھٹو سے محبت کرتے ہیں، تھرپارکر کی ترقی کے لیے محنت کر کے پاکستان پیپلز پارٹی بھی ثابت کردیا ہے کہ پیپلز پارٹی تھرپارکر کے عوام سے کتنی محبت کرتی ہے۔ چیئرمین بلاول بھٹو زرداری کا تھر انسٹی… pic.twitter.com/tANvNGim7U

— Sumeta Afzal Syed (@SumetaSyed) January 14, 2026

انہوں نے کہاکہ تھرپارکر کی ترقی کے لیے پیپلز پارٹی کی محنت یہ ثابت کرتی ہے کہ پارٹی اس علاقے کے عوام کے لیے کس قدر فکرمند ہے۔
انہوں نے کہاکہ پارٹی پورے سندھ میں اسی جذبے کے ساتھ محنت کر رہی ہے اور ہماری حکومت عوام دوست ہے۔
چیئرمین پی پی نے کہاکہ سندھ کے وسائل استعمال کرنے کی اجازت نہ دینا بدقسمتی ہے اور جب بے نظیر بھٹو نے کوشش کی تو سازشوں کی وجہ سے اسے ناکام بنایا گیا۔
انہوں نے مزید کہاکہ تھرکول کی دریافت سے علاقے میں معاشی انقلاب آیا اور اس کے نتیجے میں سماجی ترقی بھی ہوئی۔ پہلے یہاں نہ ڈسپنسری تھی، نہ ہیلتھ یونٹ اور نہ اسپتال، لیکن اب تھرپارکر میں صحت کا نظام قائم کیا گیا ہے۔ تھرپارکر کی ترقی کے لیے تھر فاؤنڈیشن بھی بنائی گئی، جسے علاقے سے حاصل منافع کا ایک حصہ فراہم کیا جاتا ہے۔
بلاول بھٹو زرداری نے کہاکہ پورے سندھ میں اسی جذبے کے ساتھ کام جاری ہے اور حکومت عوام کے مفاد میں سوچتی ہے۔ انہوں نے بتایا کہ صوبے میں یونیورسٹیز اور کیمپس کی تعداد دگنی کی گئی ہے اور امید ہے کہ تھرپارکر کے طلبہ تعلیم حاصل کر کے ہر شعبے میں ترقی کریں گے۔
انہوں نے خوشی کا اظہار کیا کہ تھرپارکر میں گلگت بلتستان کے طلبہ بھی تعلیم حاصل کرنے کے لیے آئے ہیں۔