ہم آپ کی جنگ میں رکاوٹ نہیں، تو ہمارے اضلاع میں مداخلت کیوں؟ پشتون ٹرانسپوٹرز کو نقصان پہنچانے اور پشتون علاقوں میں مداخلت کے نتائج بھیانک ہونگے نواب ایاز خان جوگیزئی کا چمن جلسہ سے خطاب ، بی ایل اے کو پیغام
چمن(قدرت روزنامہ)پشتونخواہ میپ کے رہنما قبائلی نواب ایاز خان جوگیزئی نے چمن بارڈر اور سرحدی اضلاع کی صورتحال پر پشتونخواہ میپ کے زیر اہتمام جلسے سے خطاب کرتے ہوئے کہا ہے اگر ہم آپ کی جنگ میں رکاوٹ نہیں بن رہے تو پھر ہمارے اضلاع کے معاملات میں مداخلت کیوں کی جا رہی ہے۔
نواب ایاز خان جوگیزئی نے کہا کہ چمن اور دیگر سرحدی علاقوں کے عوام پہلے ہی معاشی مشکلات، بے روزگاری اور بارڈر بندش کے باعث شدید پریشانی کا شکار ہیں۔ ایسے حالات میں مختلف گروہوں کی جانب سے مقامی معاملات میں مداخلت صورتحال کو مزید خراب کر رہی ہے۔
انہوں نے کہا کہ سرحدی اضلاع کے عوام کا روزگار بارڈر تجارت اور آمدورفت سے وابستہ ہے، لیکن بار بار بندشوں اور کشیدہ حالات کے باعث ہزاروں خاندان متاثر ہو رہے ہیں۔ انہوں نے مطالبہ کیا کہ علاقے کے عوام کے مسائل کو سنجیدگی سے حل کیا جائے اور انہیں مزید مشکلات میں نہ دھکیلا جائے۔
نواب ایاز خان جوگیزئی نے کہا کہ ہم امن، استحکام اور باہمی احترام پر یقین رکھتے ہیں۔ اگر کسی کی جنگ یا تنازع میں ہم رکاوٹ نہیں بنتے تو دوسروں کو بھی چاہیے کہ ہمارے علاقوں کے امن و امان اور مقامی معاملات میں مداخلت سے گریز کریں۔
انہوں نے زور دیا کہ چمن اور سرحدی علاقوں کے عوام کو پائیدار امن، کاروباری سہولیات اور آزادانہ آمدورفت کی ضرورت ہے تاکہ علاقے میں جاری بے چینی اور معاشی بحران کا خاتمہ ممکن ہو سکے۔
