کورونا کیسز میں اضافہ، سعودی عرب نے ایک بار پھر پابندیاں عائد کردیں

مکہ مکرمہ(قدرت روزنامہ)سعودی عرب میں کورونا کے کیسز میں اضافے کے پیش نظر حرمین شریفین میں ایک بارپھر پابندیاں عائد کرتے ہوئے طواف کے لئے پہلی منزل مختص کردی گئی ہے۔تفصیلات کے مطابق سعودی عرب میں کورونا وائرس کے پھیلاؤ میں تیزی سے اضافہ ہورہا ہے ، جس کے پیش نظر حرمین شریفین میں ایک بار پھر پابندیاں عائد کردی گئیں۔سعودی حکام کی جانب سے کوروناوائرس کے بڑھتے کیسز کے پیش نظر زائرین کیلئے ہدایات جاری کردی گئی ہے۔
وزارت حج وعمرہ کا کہنا ہے کہ طواف کےلئےپہلی منزل مختص کردی گئی ہے جبکہ دوسرے عمرے کی ادائیگی کے درمیان 10دن کا وقفہ ضروری ہے۔سعودی حکام نے کہا ہے کہ عمرہ اورنمازکے اجازت نامے مقامی شہریوں کے ساتھ ساتھ غیرملکی اور وزٹ ویزاہولڈر کو بھی جاری کیے جارہےہیں، ایپ کےذریعے جاری کسی بھی اجازت نامے پر کوئی فیس نہیں ہے۔
خیال رہے سعودی عرب میں اگست دو ہزار اکیس کے بعد یومیہ کورونا کیسز کی تعداد ایک ہزار سے تجاوز کر گئی ہے اور کورونا کیسز پانچ ماہ کی بلند ترین سطح پر پہنچ گئے۔سعودی وزارت صحت کے مطابق ملک بھر میں ایک دن میں کورونا وائرس کے ایک ہزار سات سوچھیالیس نئے کیسز اور تشویشناک کیسز کی تعداد نوے تک پہنچ گئی ہے۔