ملک میں اس وقت بیلنس نہیں ہے، فواد چوہدری

اسلام آباد (قدرت روزنامہ)پی ٹی آئی رہنما اور سابق وزیر اطلاعات فواد چوہدری کا کہنا ہے کہ اداروں سے ہی انصاف لیا جاتا ہے، ادارے ہی ملک کو مستحکم کرتےہیں لیکن ملک میں اس وقت بیلنس نہیں ہے۔
اسلام آباد ہائیکورٹ میں میڈیا سے گفتگوکرتے ہوئے سابق وزیر فواد چوہدری نے کہاکہ کسی سیاسی جماعت نے آج تک توہین مذہب کےقوانین مخالفین پر نہیں استعمال کیے، موجودہ حکومت نے توہین مذہب کے قوانین اپنے سیاسی مخالفین کیلئے استعمال کیے۔
فواد چوہدری کا کہنا تھا کہ رانا ثناء اللّٰہ سے کوئی امید نہیں، اعظم تارڑ سے متعلق افسوس ہوا۔سابق وزیر نے بتایا کہ عدالت کہتی ہے مذہب کے قوانین کا استعمال سیاسی مخالفین پر نہ کریں، وفاقی کابینہ کو مذہب کے قوانین کا سیاسی مخالفین پر استعمال سے متعلق سوچنا چاہیے۔
انہوں نے کہاکہ روضۂ رسول پر جو ہوا وہ نہیں ہونا چاہیے تھا، لندن میں جو ہورہا ہے وہ لوگوں کے جذبات کی عکاسی ہے، غریب آدمی پر ہر روز فتویٰ لے کر آجاتے ہیں۔سابق وزیر کا مزید کہنا تھا کہ استعفوں کے معاملے پر مقبوضہ اسمبلی میں ہم نہیں جاسکتے،چوکیدار سے متعلق جو حوالہ تھا وہ عقلمندوں کے لیے اشارہ تھا، میرا موقف صاف رہا کہ مذہب کارڈ نہیں استعمال کرنا چاہیے۔
فوادچوہدری کاکہنا تھا کہ ادارے ملک کو مستحکم کرتےہیں لیکن ملک میں اس وقت بیلنس نہیں ہے۔