کراچی میں لوڈشیڈنگ کا دورانیہ 14 گھنٹے تک جا پہنچا ، عوام بے حال

کراچی (قدرت روزنامہ)کراچی میں بجلی کی بدترین لوڈ شیڈنگ کی جارہی ہے جس سے عوام کی مشکلات میں مزید اضافہ ہوگیا ہے . گرمیوں میں شہرقائد کےعوام بے حال ہوچکے ہیں اور ایسے میں کے الیکٹرک نے بجلی کی لوڈ شیڈنگ کا دورانیہ مزید طویل کردیا .

کراچی میں بجلی کی فراہمی کا کوئی وقت نہیں رہا .
کے الیکٹرک کی جانب سے شہر کے مختلف علاقوں میں 12 سے 14 گھنٹے کی لوڈ شیڈنگ کی جارہی ہے ، بل کی مکمل اور بروقت ادائیگی کے باوجود شہریوں کو اذیت پہنچائی جارہی ہے جب کہ بجلی کی آنکھ مچولی سے پانی کے بحران کا خطرہ بھی پیدا ہوگیا ہے .
کراچی والوں کی زندگی جہنم بن گئی ، لوڈ شیڈنگ سے مستثنیٰ علاقوں میں بھی گھنٹوں بجلی غائب رہنا معمول بن گیا جب کہ لوڈشیڈنگ والے علاقوں میں دن میں چار مرتبہ تین سے چار گھنٹے کی لوڈشیڈنگ کی جارہی ہے . کراچی میں ایک ماہ پہلے تک جن علاقوں میں بجلی صرف ایک ایک گھنٹے کے لیے غائب ہوتی تھی اب وہاں بھی بجلی کی 3 ،3 گھنٹے کی لوڈ شیڈنگ کی جارہی ہے اور غیر اعلانیہ لوڈ شیڈنگ اس کے علاوہ ہوتی ہے .
نیشنل گرڈ سے اضافی بجلی ملنے کے باوجود کے الیکٹرک شہر کی ڈیمانڈ پوری کرنے میں ناکام ہے . کے الیکٹرک کے سائٹ کورنگی اور بن قاسم کے پاور پلانٹس سے مطلوبہ بجلی کی پیداوار میں کمی ہوئی . شہریوں کا کہنا ہے کہ صبح و شام بجلی کی آنکھ مچولی سے پانی کی قلت کا سامنا کرنا پڑ رہا ہے جب کہ لوڈشیڈنگ سے مستثنی علاقوں میں رات کے وقت غیر اعلانیہ لوڈ شیڈنگ کا دورانیہ 10 سے 14گھنٹے تک جا پہنچا .
دوسری جانب کراچی کی طرح حیدرآباد میں بھی غیراعلانیہ لوڈشیڈنگ جاری ہے . 8 سے 12 گھنٹے کی لوڈشیڈنگ سے تاجر طبقہ اور عوام سخت پریشان ہیں . شدید گرمی میں لوڈشیڈنگ کی مصیبت نے شہریوں کو نڈھال کردیا ہے . واضح رہے کہ صرف کراچی ہی نہیں بلکہ ملک کے تمام بڑے شہروں لاہور، راولپنڈی، کوئٹہ، پشاور، ملتان، بدین اور سوات سمیت کئی شہروں میں بجلی کی لوڈ شیڈنگ کا دورانیہ بڑھ گیا ہے اور خاص طور پر گزشتہ ایک ماہ کے دوران بجلی کی لوڈ شیڈنگ میں شدید اضافہ کیا گیا ہے .