حکومت بجلی و پیٹرول بم گرا رہی ہے، جماعت اسلامی عوام کو تنہا نہیں چھوڑے گی، حافظ نعیم الرحمان

اسلام آباد (قدرت روزنامہ)جماعت اسلامی پاکستان کے امیر حافظ نعیم الرحمان نے کہا ہے کہ حکمرانوں نے آئی ایم ایف کی غلامی تسلیم کرلی ہے اور بجلی و پیٹرول بم گرائے جارہے ہیں۔
لاہور میں میڈیا سے گفتگو کرتے ہوئے انہوں نے کہاکہ ملک میں ٹیکسوں کی بھرمار کے ساتھ لوڈشیڈنگ سے عوام کو مشکلات کا سامنا ہے، جماعت اسلامی لوگوں کو تنہا نہیں چھوڑے گی۔
انہوں نے کہاکہ پورے پاکستان میں احتجاجی تحریک شروع ہوچکی ہے، ہم حکومت کے ساتھ بات چیت کے لیے تیار ہیں۔
امیر جماعت اسلامی پاکستان سے ینگ ڈاکٹرز ایسوسی ایشن کے وفد نے ملاقات کی جس میں ہڑتال کے معاملات زیر بحث آئے۔
حافظ نعیم الرحمان نے کہاکہ پنجاب حکومت ینگ ڈاکٹرز کے مطالبات کو انا کا مسئلہ نہ بنائے، دفعہ 144 سے عوام کو دبانے کے انگریزوں کے ہتھکنڈے پرانے ہوچکے ہیں۔
انہوں نے کہاکہ حکومت پیرا میڈیکل اسٹاف کے مطالبات کو سنجیدگی سے دیکھے اور مسائل حل کرے۔
امیر جماعت اسلامی پاکستان نے کہاکہ حکومت دیہاڑی پر ڈاکٹروں کو رکھ رہی ہے، اسپتالوں میں سہولیات دستیاب نہیں اور بعد میں ملبہ ڈاکٹرز پر ڈالا جاتا ہے۔