پاکستان تحریک انصاف کے سیکڑوں کارکنوں کی ضمانت منظور

اسلام آباد (قدرت روزنامہ)انسداد دہشت گردی عدالت اسلام آباد نے شناخت پریڈ کے لیے بھیجے گئے پی ٹی آئی کے 532 کارکنان کی ضمانتیں منظور کرلیں۔
انسداد دہشت گردی عدالت نے ضمانتیں منظور کرتے ہوئے انہیں 20،20 ہزار روپے مچلکوں کے عوض رہا کرنے کا حکم دے دیا۔ گزشتہ روز عدالت نے 28 ملزمان کو مقدمے سے ڈسچارج کر دیا تھا۔ کیس کی سماعت انسداد دہشت گردی عدالت کے جج ابوالحسنات ذوالقرنین نے کی۔
واضح رہے کہ گزشتہ روز انسداد دہشتگردی عدالت اسلام آباد نے پولیس وین سے فرار ہونے کی کوشش کرنے والے چھیاسی ملزمان کی ضمانتیں منظور کرلیں۔ ضمانت کی درخواستوں پر سماعت انسداد دہشتگردی عدالت کے جج طاہر عباس سپرا نے کی۔ عدالت نے 86 ملزمان کی ضمانتیں منظور کرلیں۔ ملزمان میں دو ایم پی ایز، 34 پولیس اہلکاروں اور 42 ریسکیو اہلکاروں سمیت 86 افراد شامل ہیں۔
دوسری جانب لاہور ہائیکورٹ راولپنڈی بینچ نے پی ٹی آئی کے 28 ستمبر کے راولپنڈی احتجاج میں گرفتار 3 خواتین کی ضمانت منظور کی ۔ جسٹس صداقت علی خان اور جسٹس مرزا وقاص رؤف پر مشتمل ڈویژن بینچ نے فریقین وکلاء کے دلائل سننے کے بعد یہ فیصلہ سنایا۔