بنوں: مسلح افراد کا پولیس چیک پوسٹ پر دھاوا، 7 اہلکار اغوا، ہتھیار اور دیگر سامان بھی لے اڑے

اسلام آباد (قدرت روزنامہ)خیبرپختونخوا کے ضلع بنوں میں مسلح افراد نے پولیس چوکی سے 7 اہلکاروں کو اغوا کرلیا۔
ڈسٹرکٹ پولیس آفیسر (ڈی پی او) بنوں ضیاالدین کے مطابق تھانہ اتمانزئی کی حدود میں روچہ چیک پوسٹ پر مسلح ملزمان نے دھاوا بولا۔
پولیس کا کہنا ہے کہ 4 پولیس اہلکار چیک پوسٹ پر موجود نہیں تھے جس کی وجہ سے بچ گئے۔
پولیس کے مطابق مسلح ملزمان کی تعداد 30 سے 40 کے قریب تھی، جو ڈیوٹی پر موجود اہلکاروں سے تمام ہتھیار اور دیگر سامان بھی ساتھ لے گئے۔
ڈی پی او بنوں ضیاالدین نے پولیس اہلکاروں کے اغوا ہونے کی تصدیق کردی، اور بتایا کہ مسلح افراد 7 اہلکاروں کو اغوا کرکے لے گئےہیں۔
انہوں نے بتایا کہ پولیس اور سیکیورٹی اداروں نے آپریشن شروع کردیا ہے۔