ملٹری ٹرائل کیس: اے پی ایس حملہ اور 9 مئی احتجاج کے سویلینز میں کیا فرق ہے؟ آئینی بینچ

اسلام آباد (قدرت روزنامہ)سپریم کورٹ میں فوجی عدالتوں میں سویلینز کے ٹرائل کے خلاف انٹرا کورٹ اپیل پر سماعت کے دوران جسٹس مسرت ہلالی نے سوال کیا کہ اے پی ایس حملہ اور 9 مئی احتجاج کے سویلینز میں کیا فرق ہے؟ جسٹس امین الدین خان نے ریمارکس میں کہا ہے کہ اس میں کوئی دو رائے نہیں کہ آئین سے منافی کوئی قانون برقرار نہیں رہ سکتا۔
جسٹس امین الدین خان کی سربراہی میں سپریم کورٹ کا 7 رکنی آئینی بینچ فوجی عدالتوں میں سویلینز کے ٹرائل کے خلاف انٹرا کورٹ اپیل پر سماعت کر رہا ہے۔ جسٹس (ر) جواد ایس خواجہ کے وکیل خواجہ احمد حسین عدالت کے روبرو دلائل پیش کررہے ہیں۔
گزشتہ روز وزارت دفاع کے وکیل خواجہ حارث نے اپنے دلائل مکمل کیے تھے، جبکہ حکومت پنجاب، حکومت بلوچستان، وزارت داخلہ، وزارت قانون اور شہدا فاؤنڈیشن کے وکلا نے خواجہ حارث کے دلائل کو اپنایا تھا۔
جسٹس (ر) جواد ایس خواجہ کے وکیل خواجہ احمد حسین نے آج اپنے دلائل کا آغاز کرتے ہوئے کہا کہ وکیل خواجہ احمد نے کہا کہ عام سویلین ملٹری ایکٹ کا سبجیکٹ نہیں البتہ افواج پاکستان کے سول ملازمین پر آرمی ایکٹ کا اطلاق ہوتا ہے، جس پر جسٹس حسن اظہر رضوی نے استفسار کیا کہ کیا ایئر بیسز پر حملہ کرنے پر آرمی ایکٹ کا اطلاق ہوتا ہے؟
جسٹس مسرت ہلالی نے استفسار کیا کہ آرمی پبلک اسکول پر دہشت گرد حملہ ہوا اور 9 مئی پر احتجاج ہوا، دونوں واقعات کے سویلینز میں کیا فرق ہے، جس پر وکیل خواجہ احمد حسین نے جواب دیا کہ آرمی پبلک اسکول پر دہشت گرد حملہ ہوا، اس واقعے کے بعد 21 ویں ترمیم کی گئی۔
جسٹس مسرت ہلالی نے ریمارکس دیے کہ سانحہ اے پی ایس میں سارے سویلین بچے مارے گئے، جس پر وکیل خواجہ احمد حسین نے کہا کہ ہمارا مقدمہ آئین سے باہر نہیں ہے، 9 مئی والوں کا ٹرائل ہوا، لیکن یہ ملٹری ٹرائل نہیں تھا۔
آئینی بینچ کے سربراہ جسٹس امین الدین نے ریمارکس دیے کہ اس میں کوئی دوسری رائے نہیں کہ آئین سے منافی قانون برقرار نہیں رہ سکتا۔
سابق چیف جسٹس جواد ایس خواجہ کے وکیل خواجہ احمد حسین نے 9 مئی پر افواج پاکستان کے اعلامیہ کا تذکرہ کرتے ہوئے کہا کہ آئی ایس پی آر نے 9 مئی واقعہ پر 15 مئی کو اعلامیہ جاری کیا جس پر عدالت نےا ستفسار کیا کہ کیا آپ کو اعلامیہ پر اعتراض ہے؟
عدالت نے سوال کیا کہ کیا آپ کو اعلامیہ پر اعتراض ہے، جس پر وکیل خواجہ احمد حسین نے جواب میں کہا کہ میرا اعلامیہ پر کوئی اعتراض نہیں، اعلامیہ میں کہا گیا کہ 9 مئی واقعہ پر پورے ادارے میں دکھ اور درد پایا جاتا ہے، اس واقعہ کے نا قابل تردید شواہد موجود ہیں۔
خواجہ احمد حسین نے دلائل جاری رکھتے ہوئے کہا کہ کور کمانڈر اجلاس اعلامیہ کے بعد ملٹری ٹرائل میں فیئر ٹرائل کیسے مل سکتا ہے، سویلینز ملٹری ٹرائل میں نہیں آتے، ہم پورے آرمی ایکٹ کو چیلینج نہیں کررہے۔
جسٹس مسرت ہلالی نے ریمارکس دیے کہ گزشتہ روز بتایا گیا کہ ملٹری ٹرائل فئیر ٹرائل ہوتا ہے۔ اسی دوران وکیل لطیف کھوسہ نے کمرہ عدالت میں بولنے کی کوشش تو عدالت نے ان سے اظہار ناراضگی کیا۔
جسٹس امین الدین خان نے کہا کہ کھوسہ صاحب آپ سینیئر وکیل ہیں، ایسا نہ کیجیے۔ جسٹس جمال خان مندوخیل نے کہا کہ ٹو ون ڈی سیکشن 1967 میں شامل ہوا ہے۔ جسٹس حسن اظہر رضوی نے کہا کہ گزشتہ روز میں نے مہران بیس سمیت مختلف واقعات کا ذکر کیا، ٹوون ڈی ون کے تحت سویلینز آرمی ایکٹ کے انڈر آتے ہیں یا نہیں۔
وکیل خواجہ احمد حسین نے دلائل جاری رکھتے ہوئے کہا کہ جو خود متاثرہ ہو، وہ شفاف ٹرائل نہیں دے سکتا۔ جسٹس امین الدین نے کہا کہ ہمارے سامنے بھارتی جاسوس کلبھوشن یادو کی مثال موجود ہے، کلبھوشن یادو کیس میں صرف افواج پاکستان ہی متاثرہ نہیں ہے۔
جسٹس محمد علی مظہر نے ریمارکس دیے کہ آرمی ایکٹ کی شق ٹو ون ڈی ٹو کو کالعدم قرار دینے سے تو بھارتی جاسوس کلبھوشن یادو جیسے واقعات میں ملٹری ٹرائل نہیں ہوسکے گا، جس پر احمد حسین ایڈووکیٹ نے کہا کہ عدالتی فیصلے میں کلبھوشن یادو پر بات نہیں کی گئی۔
جسٹس حسن اظہر رضوی نے سوال کیا کہ کیا مستقل میں اگر کوئی ملک دشمن جاسوس پکڑا جائے تو اس کا ٹرائل کہاں ہوگا، جس پر خواجہ احمد حسین نے جواب دیا کہ اس کا ٹرائل انسداد دہشت گردی کی عدالت میں ہوگا، اس پر جسٹس اظہر رضوی نے مسکراتے ہوئے کہا ’اچھا جی‘۔
جسٹس امین الدین نے ریمارکس دیے کہ یہ عجیب بات ہے کہ قانون کی شق کو کالعدم بھی قرار دیا جائے اور یہ بھی کہا جائے کہ اسپیشل ریمیڈی والوں کو استثنیٰ ہے، جس پر وکیل خواجہ احمد حسین نے کہا کہ میں آگے بڑھنا چاہتا ہوں۔
جسٹس محمد علی مظہر نے کہا کہ مستقبل میں کیا افواج پاکستان آرمی ایکٹ کا سیکشن ٹو ون ڈی ٹو استعمال کرسکتی ہیں۔
خواجہ احمد حسین نے جواب دیا کہ یہ حقیقت ہے کہ مستقبل میں ٹو ون ڈی ٹو کا استعمال نہیں ہوسکے گا، آرمی ایکٹ سویلین کا ٹرائل کرنے کے لیے ڈیزائن ہی نہیں کیا گیا، آپ عام شہریوں کو ایسے نظام کے حوالے نہیں کرسکتے، میں آرمی ایکٹ رولز میں درج طریقہ کار پڑھ دیتا ہوں۔
جسٹس حسن اظہر رضوی نے ریمارکس دیے کہ روز سننے میں آتا ہے کہ اتنے جوان شہید ہوگئے حملہ آور سویلینز ہوتے ہیں، آپ کے مطابق سویلینزکا ٹرائل ملٹری کورٹس میں نہیں انسداد دہشت گردی عدالت میں ہونا چاہیئے، ٹو ڈی ون ٹو کے کالعدم ہونے پر ملزمان کا ٹرائل کیسے ہو گا، اس وقت ملک کے کچھ صوبے دہشت گردی کی لپیٹ میں ہیں، ملک میں مکتی باہنی کی تحریک نہیں حملہ آور سویلینز ہی ہیں۔
جسٹس ر جواد ایس خواجہ کے وکیل خواجہ احمد حسین نے لیاقت حسین کیس کا حوالہ دیا تو جسٹس حسن اظہر رضوی نے کہا کہ لیاقت حسین کیس کراچی ایئر بیس واقعہ پر تھا، جس پر وکیل خواجہ احمد حسین نے کہا کہ ریاستی رازوں کا معاملہ ہو تو ان کیمرا ٹرائل ہوسکتا ہے۔
جسٹس امین الدین خان نے کہا کہ قانون کو محض مفروضے کی بنیاد پر اڑا دیا گیا۔ جسٹس جمال خان مندوخیل نے کہا کہ 2 ون ڈی کو مفروضوں پر خلاف قانون قرار دے دیا گیا، ایف بی علی کیس سے لیکر اب تک کسی عدالت نے 2 ون ڈی کو نہیں چھیڑا تھا لیکن اب آکر عدالت نے اسے خلاف قانون قرار کیوں دیا۔
وکیل خواجہ احمد حسین نے کہا کہ ریاست بنیادی انسانی حقوق کی ضامن ہوتی ہے، اٹارنی جنرل نے یقین دلایا تھا کہ 9 مئی کے ملزمان کے بنیادی حقوق کا تحفظ ہوگا، جسٹس عائشہ ملک نے اپنے فیصلے میں سویلین کے ملٹری ٹرائل کو بنیادی حقوق اور شفاف ٹرائل کے منافی قرار دیا، فیلڈ جنرل کورٹ مارشل میں پسند کا وکیل کرنے کی اجازت نہیں۔
جسٹس مسرت ہلالی نے استفسار کیا کہ کیا آپ ملزمان کا مقدمہ یہاں پر لڑرہے ہیں جو ہمارے سامنے نہیں؟ جس پر خواجہ احمد حسین نے کہا کہ فیلڈ جنرل کورٹ مارشل میں وکیل آرمی چیف کی اجازت سےملتا ہے، آرمی چیف اجازت نہ دیں تو پسند کا وکیل نہیں ملتا، فیصلہ کوئی اورکرتا ہے فیصلے کوکنفرم دوسری اتھارٹی کرتی ہے، ایسے تو کنفرمنگ اتھارٹی ناٹ گلٹی کو گلٹی بھی کرسکتی ہے۔
جسٹس جمال مندوخیل نے ریمارکس دیے کہ ایف بی علی سمیت عدالتی فیصلوں سے کیسے انحراف کرسکتے ہیں، ایف بی علی کیس میں قانونی شقوں کوبرقراررکھا گیا، ایف بی علی فیصلے کی کئی عدالتوں میں توثیق کی گئی، 21 ویں ترمیم کا فیصلہ 17 ججز کا ہے۔
جسٹس جمال مندوخیل نے مزید کہا کہ دہشت گردی روکنا ایڈمنسٹریشن کا کام ہے، ان کی ذمہ داری ہے کہ شواہد اکٹھے کرے، عدالت کے سامنے جب شواہد نہیں ہونگے توفیصلے کیسے دیں گے؟ پھر کہتے ہیں کہ پاکستان کی جوڈیشری 130ویں نمبرپرہے۔
جسٹس حسن اظہررضوی نے ریمارکس دیے کہ اے ٹی سی ہویا کوٸی عدالت بہتری کے لیے اصلاحات ضروری ہوتی ہیں۔
بعدازاں، فوجی عدالتوں میں سویلینز کے ٹرائل کے فیصلے کے خلاف انٹرا کورٹ اپیلوں پر سماعت پیر تک ملتوی کردی گئی۔ جسٹس ریٹائرڈ جواد ایس خواجہ کے وکیل خواجہ احمد حسین پیر کو بھی دلائل جاری رکھیں گے۔