فیفا نے پاکستان فٹبال فیڈریشن کی رکنیت ایک بار پھر کیوں معطل کردی؟

اسلام آباد (قدرت روزنامہ)فٹبال کی عالمی تنظیم فیفا نے پاکستان فٹبال فیڈریشن (پی ایف ایف) کی رکنیت ایک بار پھر معطل کردی ہے۔
میڈیا رپورٹس کے مطابق، فیفا نے پی ایف ایف نے معطلی کی وجہ بیان کرتے ہوئے کہا ہے کہ پی ایف ایف اپنے آئین میں وہ ترامیم شامل کرنے میں ناکام رہی جو شفاف اور جمہوری انتخابات کو یقینی بنانے اور فیفا کے طے شدہ اصولوں کے مطابق پی ایف ایف کی نارملائزیشن کا عمل مکمل کرنے میں اہم کردار ادا کرسکتی ہیں۔
فیفا نے پاکستان فٹبال فیڈریشن کو فوری طور پر معطل کردیا ہے اور پاکستان کی ٹیموں پر انٹرنیشنل ایونٹس میں شرکت پر پابندی عاٸد کردی ہے۔ معطلی کے سبب پاکستان کو فیفا سے ملنے والے فنڈز کی فراہمی بھی معطل ہوجائے گی۔
فیفا نے کہا ہے کہ پی ایف ایف کی معطلی اس وقت تک برقرار رہے گی جب تک پی ایف ایف کانگریس فیفا اور ایشین فٹبال کنفیڈریشن (اے ایف سی) کی جانب سے پیش کردہ آئینی ترامیم کی منظوری نہیں دے دیتی۔
یاد رہے کہ فیفا کی جانب سے پی ایف ایف کو پہلی بار معطل نہیں کیا گیا۔ اس سے قبل اپریل 2021 میں فیفا نے پاکستان فٹبال فیڈریشن کو اس وقت معطل کیا تھا جب اشفاق حسین گروپ نے پی ایف ایف کے دفاتر پر قبضہ کرلیا تھا۔ پی ایف ایف پر پابندی جون 2022 میں ختم کی گئی تھی۔
واضح رہے کہ فیفا اور اے ایف سی نے پی ایف ایف کو اپنے آئین میں خصوصاً انتخابی عمل سے متعلق شقوں میں ترامیم کرنے کی سفارش کی تھی، تاہم پی ایف ایف کی منتخب کانگریس نے ان ترامیم کو مسترد کردیا تھا جس کے نتیجے میں یہ معطلی عمل میں آئی۔