وزیر اعظم شہبازشریف کو ترک صدر اردگان نے کون سی گاڑی تحفہ دی؟

اسلام آباد (قدرت روزنامہ)پاکستان کے سرکاری دورے پر آئے ترک صدر رجب طیب اردوان نے وزیر اعظم شہباز شریف کو ترکیہ میں تیار کی گئی الیکٹرک گاڑی ’ٹوگ‘ کا ایک ماڈل تحفہ دیا ہے۔
تین ایشیائی ممالک کے دورے پر نکلے ترک صدر اردوان نے پاکستان کے اپنے 2 روزہ دورے کے دوران اسلام آباد میں ٹی10 ایکس ماڈل کی اسپورٹس یوٹیلیٹی وہیکل ’ٹوگ‘ وزیر اعظم شہباز شریف کو تحفے میں دی۔
میڈیا رپورٹس کے مطابق دونوں سربراہان نے سبز رنگ کی گاڑی کے سامنے تصویر کھنچوانے سے پہلے بات چیت کرنے کے لیے وقت نکالا، کار کا منفرد رنگ ترکی کے بحیرہ اسود کے ساحل پر اردگان کے آبائی شہر رائز میں واقع سرسبز آئیڈر ہائی لینڈز سے متاثر ہے۔
اس موقع پر ترک صدر رجب طیب اردوان وزیر اعظم شہباز شریف کے ہمراہ گاڑی میں بیٹھے اور وزیر اعظم نے الیکٹرک ایس یو وی کو تھوڑا گھمایا، تصویر میں قید ہونے والے اس لمحہ سے دونوں ممالک کے درمیان بڑھتے ہوئے دیرینہ تعلقات کی عکاسی ہوتی ہے۔
پاکستان اس ہفتے ترک صدر رجب طیب اردوان کے ایشیا کے دورے کا تیسرا اور آخری پڑاؤ تھا، ہفتے کے شروع میں اردگان نے ملائیشیا کا دورہ کیا جہاں انہوں نے ملائیشیا کے وزیر اعظم انور ابراہیم کو اسی طرح کی ٹوگ گاڑی تحفے میں دی تھی، بدھ کو انہوں نے انڈونیشیا کے صدر پرابوو سوبیانتو کو بھی ایک اور ٹوگ پیش کی تھی۔