رضوان کی کپتانی “فراری سے رکشے” پر آگئی ہے

لاہور (قدرت روزنامہ)قومی ٹیم کے سابق فاسٹ بولر محمد عامر نے کپتان محمد رضوان کی کپتانی میں تبدیلی کو فراری سے رکشے پر آنا قرار دیدیا۔
نجی ٹی وی کے پروگرام میں گفتگو کرتے ہوئے سابق فاسٹ بولر محمد عامر نے کہا کہ وہ ڈومیسٹک کرکٹ اور پاکستان سپر لیگ (پی ایس ایل) کے دوران انکی کپتانی کی تعریف کرتے تھے لیکن جب سے وہ پاکستانی ٹیم کے کپتان مقرر ہوئے ہیں واضح فرق دیکھنےکو ملا ہے۔
انہوں نے کہا کہ محمد رضوان کی کپتانی کو آپ فراری سے رکشے پر آنا قرار دے سکتے ہیں، یہ ‘غیر معمولی’ ہے۔
محمد عامر نے کہا کہ محمد رضوان کے پاس ڈومیسٹک کرکٹ اور پی ایس ایل کی کپتانی کا تجربہ تھا، انہوں نے کئی بار ٹیم کو فائنل میں پہنچایا ہے لیکن اب کپتانی میں فرق دیکھ رہا ہے کیونکہ میں اسوقت ڈریسنگ روم کا حصہ نہیں ہوں، اس لیے نہیں معلوم کیا ہورہا ہے۔
انہوں نے کہا کہ محمد رضوان کو قیادت ملنے کے بعد امید تھی کہ وہ مثبت تبدیلی لائیں گے لیکن چند مہینوں میں ایسا محسوس ہوا کہ وہ اپنی سوچ سے دور ہوگئے ہیں۔
محمد رضوان نے گزشتہ سال اکتوبر میں وائٹ بال کی کپتانی سنبھالنے کے بعد مختصر عرصے کیلئے آسٹریلیا اور جنوبی افریقا کے خلاف تاریخی ون ڈے سیریز میں پاکستان کی قیادت کی جہاں گرین شرٹس فتحیاب رہے۔
تاہم، مسلسل تین سیریز جیتنے کے بعد، رضوان کی قیادت والی ٹیم نے حال ہی میں سہ ملکی ہوم ون ڈے سیریز اور چیمپئینز ٹرافی میں فتح حاصل کرنے سے محروم رہی۔