چیف الیکشن کمشنر سمیت ممبران کی تعیناتی میں تاخیر؛ وزیراعظم اور صدر کو نوٹس جاری

اسلام آباد (قدرت روزنامہ)اسلام آباد ہائیکورٹ نے چیف الیکشن کمشنر اور دو الیکشن کمیشن ممبران کی تعیناتی میں تاخیر کے خلاف قومی اسمبلی اور سینیٹ کے قائد حزب اختلاف کی درخواست پر وفاق، وزیر اعظم کو بذریعہ پرنسپل سیکریٹری اور صدر کو بذریعہ سیکریٹری کو پری ایڈمشن نوٹس جاری کر دیے۔
ہائیکورٹ کے جسٹس محمد اعظم خان نے قومی اسمبلی و سینیٹ میں اپوزیشن لیڈرز عمر ایوب اور شبلی فراز کی درخواست پر سماعت کی۔
عدالت نے چیف الیکشن کمشنر اور ارکان کو بھی پری ایڈمشن نوٹس جاری کردیے۔ جسٹس محمداعظم نے قومی وسینیٹ میں اپوزیشن لیڈرز کی درخواست پر سماعت کی۔ پی ٹی آئی رہنما عمر ایوب خان اور شبلی فرازنے تعیناتی میں تاخیر کے خلاف رجوع کیا تھا۔
اسلام آباد ہائیکورٹ نے پری ایڈمشن نوٹسز جاری کرتے ہوئے کیس کی سماعت 29 اپریل تک ملتوی کر دی۔
وکیل درخواست گزار کا کہنا تھا کہ چیف الیکشن کمشنر اور الیکشن کمیشن ارکان اپنی مدت ختم ہونے کے باوجود کام کر رہے ہیں۔
عدالت نے استفسار چیف الیکشن کمشنر اور الیکشن کمیشن ارکان کی تعیناتیوں کا پراسیس شروع ہوا ہے؟
وکیل درخواست گزار نے جواب دیا کہ ابھی تک پراسیس بھی اسٹارٹ نہیں کیا گیا، اس پر پارلیمانی کمیٹی تشکیل ہونی ہے۔