متحدہ عرب امارات میں دن کی روشنی میں محرم کا چاند نظر آگیا

ابوظہبی (قدرت روزنامہ) متحدہ عرب امارات میں نئے اسلامی سال کے آغاز پر دن کے وقت محرم کا چاند نظر آ گیا۔
اسلامی قمری سال 1448 ہجری کے پہلے مہینے محرم الحرام کے آغاز کے موقع پر متحدہ عرب امارات کے فلکیاتی مرکز نے پیر 15 جون کو دن کے وقت محرم کا چاند دیکھے جانے کی تصدیق کی ہے۔ چاند کی تصویر ابو ظہبی میں واقع ختم فلکیاتی رصدگاہ نے صبح 11 بجے حاصل کی، رصدگاہ کی جانب سے جاری کی گئی تصویر کے مطابق اس وقت چاند سورج سے 5.4 درجے کے فاصلے پر تھا جبکہ اس کی عمر 5 گھنٹے اور 35 منٹ تھی۔
متحدہ عرب امارات کے شہریوں اور رہائشیوں کو ایک بار پھر طویل تعطیلات سے لطف اندوز ہونے کا موقع ملا، کیونکہ حکومت نے نئے اسلامی سال کے آغاز کے موقع پر پیر 15 جون کو سرکاری تعطیل کا اعلان کیا۔ ان افراد کے لیے جو ہفتہ اور اتوار کو معمول کی ہفتہ وار چھٹی مناتے ہیں، یہ تین روزہ تعطیل بن گئی۔ دوسری جانب شارجہ میں سرکاری ملازمین اور طلبہ نے چار روزہ تعطیلات کا لطف اٹھایا، کیونکہ وہاں معمول کے مطابق جمعہ، ہفتہ اور اتوار ہفتہ وار تعطیلات کے دن ہیں۔
اسلامی یا ہجری کیلنڈر قمری مہینوں پر مبنی ہے اور نئے سال کا آغاز یکم محرم سے ہوتا ہے، جس کا تعین چاند کی رویت سے کیا جاتا ہے۔ ہجری کیلنڈر کا ہر مہینہ 29 یا 30 دنوں پر مشتمل ہوتا ہے۔
ہجری نئے سال کی سرکاری تعطیل کے موقع پر پیر 15 جون کو دبئی میں تمام عوامی پارکنگ مفت کر دی گئی، تاہم کثیر المنزلہ پارکنگ کی سہولت اس سے مستثنیٰ رہی۔ معمول کے پارکنگ نرخ منگل 16 جون سے دوبارہ نافذ کر دیے جائیں گے۔